Vonar að geitin fái að vera þrátt fyrir þúsundir sem vilja hana feiga

Kostnaðurinn getur hlaupið á nokkrum milljónum ef lokatakmarki íslenskra brennuvarga verður náð, það er að bera eld að hinni landsfrægu jólageit IKEA. Þetta segir Guðný Camilla Aradóttir, upplýsingafulltrúi IKEA á Íslandi, í samtali við Vísi.

Nýlega var stofnaður Facebook-viðburður undir yfirskriftinni „Kveikjum í geitinni, þau geta ekki stöðvað okkur öll,“ og hafa á fimmta þúsund Fésbokarnotenda lýst yfir komu sinni eða í það minnsta áhuga á fyrirhugaðri geitabrennu.

Í viðburðarlýsingunni er viðburðarík saga geitarinnar rakin auk þess sem sá ónafngreindi aðili sem skrifar virðist hafa ímugust á því hve snemma IKEA setur geitin upp og boðar þannig að koma jólanna sé á næsta leiti.

Guðný Camilla segir að geitin sé afar vel vöktuð, líkt og síðustu ár. Þrátt fyrir að um augljóst grín sé að ræða þurfi ekki nema nokkra til þess að taka grínið of langt. Af litlum neista verður oft mikið bál, eins og skáldið sagði.

„Við munum vakta þetta vel. Við erum með öfluga öryggisdeild,“ segir Guðný og bendir á að síðustu ár hafi geitin fengið að standa óáreitt. Síðast var borinn eldur að geitinni árið 2016.

„Þetta er búið að vera frekar stillt. Við viljum nú helst að brennuvargarnir leiti sér hjálpar, því þetta er ekkert sniðugt,“ segir Guðný og bendir á að árið 2017 hafi tilvonandi brennuvargar næstum slasað sig í árangurslausri tilraun til þess að koma geitinni fyrir kattarnef.

Guðný segir að kostnaðurinn við geitabrennuna hafi síðast hlaupið á nokkrum milljónum, teljandi á fingrum annarrar handar.

„Þá voru þeir sem þetta gerðu kærðir og allur kostnaður tekinn saman. Ef ég man rétt þá voru þetta um fjórar milljónir.“

Guðný gefur ekki mikið fyrir gagnrýni þeirra sem vilja geitina feiga, um að IKEA fagni jólunum of snemma.

„Það er eitthvað sem við heyrum á hverju ári. Þetta hefur ekki breyst í mörg ár. Svona er hátturinn á þessu eins og hjá mörgum,“ segir Guðný og bætir við að hún telji það vera háværan minnihluta sem setur sig svo harðlega á móti snemmbúinni jólastemningu. Því til stuðnings bendir hún á að einhverjar þeirra jólavara sem IKEA býður nú upp á séu að seljast upp.

Guðný segir fyrst og fremst leiðinlegt að fólk geti ekki séð eigur annarra í friði og vilji þannig kála geitinni.

„Ég vil höfða til heilbrigðrar skynsemi brennuvarganna, því þetta er bara stórhættulegt fyrir þá og aðra. Skemmdarfýsn er voðalega leiðinleg. Það er ekki okkar ætlun að fólk sjái þetta sem ögrun eða áskorun um að ná að kveikja í geitinni.“

Að mati Guðnýjar virðist vera komin fram „ný kynslóð grínara“ sem vill senda geitina yfir móðuna miklu. Umræðan um slíkt hafi verið í lægð fram að því að Facebook-viðburðurinn var stofnaður.

„Þegar það eru komnir nokkur þúsund manns sem finnst þetta sniðugt þá sperrir maður upp augu og eyru og fylgist vel með.“