Tröllvaxinn munur á húsnæðislánum: Fjórum sinnum hærri vextir á Íslandi

Elín Elísabet Torfadóttir og Konráð Pálmason fluttu ásamt þremur sonum sínum til Stokkhólms sumarið 2016. Þau eru búin að koma sér notalega fyrir í rauðmáluðu timburhúsi í skógarjaðri í úthverfi borgarinnar, sem þau keyptu níu mánuðum eftir að þau fluttu út. Lóa Pind heimsækir fjölskylduna í öðrum þætti af Hvar er best að búa? sem verður á dagskrá Stöðvar 2 í kvöld kl. 19:10.

Þau tóku húsnæðislán í Svíþjóð með óverðtryggðum breytilegum vöxtum. Vextirnir á láninu þeirra voru 1,3 prósent. Lóa Pind kannaði vaxtamarkaðinn á Íslandi við vinnslu þáttanna, þá voru lægstu óverðtryggðu breytilegu vextir á Íslandi 5,4 prósent eins og sjá má í myndbrotinu sem hér fylgir. Það voru sem sagt fjórum sinnum hærri vextir á íslenskum krónum en sænskum. Í myndbrotinu sem hér fylgir úr þætti kvöldsins má sjá hvað það munar miklu á láni til 40 ára.

Þátturinn er annar í röðinni af átta þáttum þar sem Lóa Pind heimsækir ásamt myndatökumanni, fólk og fjölskyldur í níu löndum í fjórum heimsálfum. Fjórir þættir verða sýndir fyrir jól og fjórir eftir jól. 

Í þáttunum heimsækja þau Íslendinga sem létu drauminn um að búa í útlöndum rætast, meðal annars fjölskyldu sem er að byggja draumahús á Balí, flugvirkja og markþjálfa í Englandi, unga fjögurra barna móður sem gerðist múslimi í Marokkó, eldri borgara sem njóta lífsins á Spáni, fyrrverandi lögregluþjón og fyrrverandi dönskukennara hjá tölvuleikjarisa á Kýpur og hjón sem ákváðu að selja allt sitt og flakka um veröldina á heimasmíðuðum húsbíl.

Framleiðandi og leikstjóri þáttanna er Lóa Pind Aldísardóttir, myndatökumenn eru Lúðvík Páll Lúðvíksson og Egill Aðalsteinsson, klippingu annast Ólafur Þór Chelbat, Tumi Bjartur Valdimarsson og Guðni Hilmar Halldórsson. Framleitt af Lóa Production fyrir Stöð 2.