Appelsínugul veðurviðvörun gefin út á Suðurlandi og Faxaflóa

Veðurstofan hefur gefið út appelsínugula viðvörun fyrir Suðurland og Faxaflóa vegna suðaustan roks og rigningar. Appelsínugulur er næst hæsta viðvörunarstig Veðurstofunnar. 

Á Suðurlandi og Faxaflóa í kvöld er spáð suðaustan 20 til 28 metrum á sekúndu og vindhviðum yfir 40 metrum á sekúndu við fjöll. Varasamt verður að vera á ferðinni og samgöngutruflanir eru sagðar líklegar. Auknar líkur eru taldar á foktjóni. Hvassast verður við Hafnarfjall, á Kjalarnesi og í uppsveitum Borgarfjarðar.

Sjá einnig: Öllu innanlandsflugi aflýst og truflanir á ferðum Strætó

Gul viðvörun er enn í gildi fyrir aðra landshluta fyrir utan Vestfirði. Samkvæmt upplýsingum Veðurstofunnar felur appelsínugul viðvörun í sér „miðlungs til eða miklar líkur á veðri sem valdið getur miklum samfélagslegum áhrifum.“

Öllu innanlandsflugi Air Iceland Connect í dag hefur verið aflýst vegna veðurs. Flugi félagsins til og frá Reykjavík, Akureyri, Egilsstöðum, Ísafirði og Grímsey hefur verið fellt niður. Flug félagsins á morgun er enn á áætlun, samkvæmt upplýsingum frá flugfélaginu. Sömuleiðis hefur öllum flugferðum Flugfélagsins Ernis í dag verið aflýst.

Einnig er nokkuð um truflanir á ferðum Strætó á landsbyggðinni.

Fréttin var síðast uppfærð klukkan 13:30