Sportpakkinn: Valsmenn með vindinn í seglin

Valur vann sinn fimmta leik í röð í Olís-deild karla þegar liðið lagði Stjörnuna að velli, 25-30, í Garðabænum í gær.

Valsmenn eru komnir upp í 6. sæti deildarinnar eftir erfiða byrjun á tímabilinu.

Anton Rúnarsson skoraði átta mörk fyrir Val og Magnús Óli Magnússon sex. Liðið á Róbert Aron Hostert og Agnar Smára Jónsson enn inni en þeir eru ekki komnir á fulla ferð aftur eftir meiðsli.

Leó Snær Pétursson var markahæstur Stjörnumanna með níu mörk. Stjarnan er í 10. sæti deildarinnar með sex stig. Eini sigur Garðbæjarliðsins á tímabilinu kom gegn botnliði HK.

Íslandsmeistarar Selfoss unnu sinn annan leik í röð þegar þeir sigruðu Fjölni, 26-35.

Selfyssingar eru í 3. sæti deildarinnar en Fjölnismenn í því ellefta og næstneðsta.

Frétt Guðjóns Guðmundssonar um leikina tvo má sjá hér fyrir neðan.