„Neymar hægir sér á PSG og stuðningsmenn liðsins“

Emmanuel Petit, fyrrverandi heims- og Evrópumeistari með franska landsliðinu, hefur ekki mikið álit á Neymar, leikmanni Paris Saint-Germain.

Petit segir viðhorf Brasilíumannsins ekki vera til eftirbreytni og vorkennir samherjum hans.

„Hann spilar aðeins fyrir sjálfan sig,“ sagði Petit um Neymar.

„Settu þig í spor leikmanna PSG að þurfa að afbera hann. Leikmanns sem hægir sér á félagið og stuðningsmenn þess. Hann sýnir engum virðingu.“

Neymar hefur verið mikið frá vegna meiðsla undanfarna mánuði og missti m.a. af Suður-Ameríkukeppninni í sumar þar sem Brasilía stóð uppi sem sigurvegari.

Neymar hefur verið hjá PSG síðan 2017 en hann kom til félagsins frá Barcelona.