Halda frumsýninguna en blása af partýið

Borgarleikhúsið mun halda sínu striki og frumsýna Bubbasöngleikinn Níu líf í kvöld. 

Fyrr í dag var greint frá því að Þjóðleikhúsið hefði ákveðið að fresta öllum sýningum frá og með deginum í dag. 

Í tölvupósti frá Brynhildi Guðjónsdóttur leikhússtjóra Borgarleikhússins til starfsmanna  segir hún mikilvægt fyrir starfsandann að sýningin fari fram í kvöld.

Þó hefur verið tekin ákvörðun um að blása af fyrirhugað frumsýningarpartý eftir sýninguna í ljósi tíðinda þeirrar stöðu sem er komin upp. Brynhildur segir ljóst að nýlega fyrirskipað samkomubann muni hafa áhrif á starfsemi leikhússins og verði unnið að því að vinna áætlun samkvæmt því.

Sýningarnar laugardag og sunnudag eru enn á dagskrá að því er fram kemur í tilkynningu frá Borgarleikhúsinu. Þær sýningar sem eru á plani eftir að samkomubann tekur gildi verða færðar.