Fram­dyrnar opnast aftur á mánu­daginn

Framdyr strætisvagna á höfuðborgarsvæðinu verða allar opnaðar á nýjan leik á mánudaginn næsta, 8. júní. Svæði inn í strætisvögnum verður því ekki lengur skipt í tvennt.

Þetta kemur fram í tilkynningu frá Strætó. Þar segir að engar fjöldatakmarkanir eða fjarlægðarmörk verði í gildi um borð í vögnunum. Hins vegar séu fremstu, stöku sætin um borð í vögnunum sérstaklega ætluð þeim farþegum sem kjósa að halda frekari fjarlægð við aðra farþega.

Þessi útfærsla er samkvæmt nýjum leiðbeiningum sóttvarnarlæknis og heilbrigðisyfirvalda:

„Í almenningsrýmum þar sem gert er ráð fyrir að almenningur eigi aðgengi að, hvort sem er án skilyrða eða að uppfylltum skilyrðum, s.s. greiðslu aðgangsgjalds eða vegna vinnusambands, skal leitast við að bjóða einstaklingum að halda 2ja metra fjarlægð frá öðrum eins og kostur er.“