Lands­liðs­merkið slær í gegn: Milljón spilanir á innan við sólar­hring

Nýtt merki íslensku knattspyrnulandsliðanna hefur slegið í gegn í netheimum eftir að það var kynnt í gær. Myndband sem KSÍ birti á Twitter-síðu sinni hefur verið spilað í yfir milljón skipta á innan við sólarhring og eru viðbrögðin ákaflega jákvæð.

Þekktir fjölmiðlamenn hafa hrósað Knattspyrnusambandi Íslands fyrir vinnubrögðin; segja þau til fyrirmyndar og að nýtt viðmið hafi verið sett í hvernig á að standa að kynningu nýrra búninga og merkja.

„Þetta er besta hönnun sem ég hef séð í áraraðir,“ segir vinsæll grafískur hönnuður á Twitter-síðu sinni.

Hrós frá Henry

Henry Winter er yfir knattspyrnuskrifum á vefsíðu Times og er með 1,2 milljónir fylgjenda á Twitter. Hann deildi myndbandinu frá síðu KSÍ og sagði að Íslendingar hefðu sett nýtt viðmið í að kynna nýtt merki.

Fjölmiðlakonan Elaine Buckley starfar fyrir írska ríkisútvarpið. Hún er einnig heilluð af framsetningu myndbandsins, segir að Ísland hafi tekið knattspyrnuheiminn í kennslustund.

Grafíski hönnuðurinn David Rudnick hefur heldur ekki farið leynt með aðdáun sína á nýja merkinu, myndbandinu og öllum sem tengist hinni nýju ásýnd landsliðanna.

Á Twitter-síðum sem tileinkaðar eru knattspyrnunni fær KSÍ einnig lof. Á Football Kit Geek er búningurinn sagður magnaður og á síðunni Photos of Football er myndbandinu lýst sem epísku og því haldið til haga að landsliðsmarkvörðurinn Hannes Þór Halldórsson hafi leikstýrt því.

Sports Illustrated fjallar um Hannes

Bandaríski íþróttamiðillinn Sports Illustrated var stofnaður 1954 og þarf vart að kynna fyrir íþróttaáhugafólki. Blaðamaður SI fjallar um Hannes Þór Halldórsson, leikstjóra og markmann, í grein sem birtist á miðlinum í gær. Þar er eitt helsta afrek Hannesar á knattspyrnuvellinum rifjað upp, þegar hann varði víti á HM frá sjálfum Lionel Messi.

Í frétt SI segir að myndbandið minni frekar á Game of Thrones en efni sem knattspyrnusambönd senda frá sér.

Erlendir aðdáendur Íslands

Viðbrögðin á Twitter-síðu KSÍ eru mjög svo jákvæð, en nánast allir sem tjá sig þar eiga vart til orð yfir hversu glæsilegt myndbandið er. „Fyrst þetta frábæra Eurovision-lag, svo Eurovision kvikmyndin og nú þetta. 2020 er ár Íslands. Vissulega er samkeppnin ekki mikil, en sigur er sigur,“ segir einn Twitter-notandi. „Ég ætlaði einmitt að spyrja hvað það væri við Ísland þetta árið. Undanfarin tvö ár hefur Ísland verið vinsæll áfangastaður ferðamanna, en í ár hefur það verið alls staðar,“ segir annar.

Meðal þeirra sem tjá sig á Twitter-síðu KSÍ er stjórnarformaður skoska knattspyrnufélagsins Motherwell, Alan Burrows. Hann er mjög hrifinn af öllu sem tengist myndbandinu og merkinu og hrósar KSÍ fyrir að fanga sögu landsins í merkinu. Að hann tjái sig er skemmtilegt, en víkingaklappið margfræga kemur frá stuðningsmönnum Motherwell. Félagið mætti Stjörnunni í undankeppni Evrópudeildarinnar 2014. Silfurskeiðin, hin öfluga stuðningssveit Stjörnunnar, heyrði þá stuðningsmenn Motherwell hvetja lið sitt með þessum hætti. Stjörnumenn fengu stuðningssönginn að láni og þýddu hann. Skömmu síðar var hann notaður á landsleikjum Íslands og á EM 2016 kynntist heimurinn þessu samræmda klappi sem kennt hefur verið við víkinga. Þessa sögu virðast stuðningsmenn Motherwell þekkja vel því einn þeirra skrifaði í gær við færslu Burrows: „Við getum alltaf verið stolt af því að hafa gefið þeim klappið.“