Tróna á toppnum með fullt hús stiga og hafa ekki enn fengið á sig mark

HK fær ÍR í heimsókn í 2. deild kvenna í kvöld. Liðið er með fullt hús stiga eftir þrjár umferðir og á enn eftir að fá á sig mark. Er þetta fyrsta tímabil HK í meistaraflokki.

Þegar Pepsi Max deild kvenna lauk síðasta sumar sat HK/Víkingur á botni deildarinnar með sjö stig úr 18 leikjumþ Í kjölfarið var ákveðið að slíta samstarfi HK og Víkings en liðin höfðu haldið úti sameiginlegum meistaraflokki til fjölda ára. Hafði liðið flakkað á milli efstu og næst efstu deildar. 

Nú vildu bæði lið láta reyna á að halda úti sitt hvorum meistaraflokknum. Þannig að þegar Íslandsmótið í fótbolta fór loks af stað um miðjan júní mánuð voru bæði lið skráð til leiks. Víkingur hélt sæti sameiginlegs liðs HK/Víkings í Lengjudeildinni á meðan HK var skráð til leiks í 2. deildina.

Deildin er nokkuð sterk og alls eru níu lið sem taka þátt í ár. Ásamt HK eru Álftanes, Hamrarnir, ÍR, Grindavík, Fram, Sindri, Hamar og sameiginlegt lið Fjarðarbyggðar, Hattar og Leiknis Fáskrúðsfjarðar í deildinni.

HK gæti vart hafa byrjað betur en liðið er með fullt hús stiga eftir þrjár umferðir. Þá hefur liðið skorað tíu mörk án þess að fá á sig eitt. HK er þar með eina lið deildarinnar sem hefur ekki enn fengið á sig mark.

Aðeins eitt annað lið hefur ekki enn fengið á sig mark í öllum þremur deildunum kvennamegin. Það eru nágrannar HK í Breiðablik. Það er ljóst að varnarleikur er í hávegum hafður í Kópavogi.

Kvennalið HK – líkt og karlalið félagsins – leikur heimaleiki sína inn í Kórnum. Í fyrstu tveimur umferðum 2. deildar komu Hamar og Hamrarnir í heimsókn. Lokatölur í báðum leikjum 3-0 HK í vil. Síðan lögðu Kópavogsstúlkur land undir fót og fóru á Vilhjálmsvöll á Egilsstöðum þar sem þær unnu sameiginlegt lið Fjarðarbyggðar, Hattar og Leiknis F. örugglega 4-0.

Markaskorun liðsins dreifist nokkuð vel, alls eru fimm leikmenn liðsins komnir á blað. 

María Lena Ásgeirsdóttir er markahæst með þrjú mörk. Þar á eftir koma reynsluboltinn Karen Sturludóttir og Emma Sól Aradóttir með tvö mörk. Þær Ragnheiður Kara Hólm Örnudóttir og Lára Hallgrímsdóttir eru svo báðar með eitt mark hvor.

Þá verður að minnst á Hrafnhildi Hjaltalín en hún stendur á milli stanganna og á enn eftir að fá á sig mark.

ÍR kemur í heimsókn í Kórinn í kvöld og forvitnilegt að sjá hvort þær finni glufur á þéttri vörn heimastúlkna í blíðskaparveðrinu í Kópavogi. Þá er spurning hvort karlaliðið gæti lært eitt og annað af kvennaliði félagsins en HK-ingar hafa fengið á sig 13 mörk í aðeins fimm leikjum í Pepsi Max deild karla það sem af er sumri.