Sjáðu meistarafögnuð Real og furðuvítið

Zinedine Zidane og lærisveinar hans í Real Madrid fagna vel í kvöld eftir að hafa tryggt sér spænska meistaratitilinn. Real hefur nú orðið Spánarmeistari 34 sinnum, langoftast allra.

Karim Benzema skoraði bæði mörk Real í kvöld þegar liðið vann Villarreal 2-1 í næstsíðustu umferð, á meðan að Barcelona tapaði fyrir Osasuna á heimavelli. Sigur hefði alltaf dugað Real til að tryggja sér titilinn og því var ákaft fagnað þegar dómarinn flautaði til leiksloka, á Alfredo Di Stéfano vellinum sem Madrídingar hafa spilað á eftir hléið vegna kórónuveirufaraldursins.

Mörkin úr leiknum í kvöld og meistarafögnuð Real má sjá hér að neðan. Seinna mark Real kom úr hálfurðulegu víti á 77. mínútu, sem þurfti að taka tvisvar. Sergio Ramos tók fyrri spyrnuna, og rétt snerti boltann svo að Benzema gæti komið og skorað, en Benzema þótti hafa farið of snemma af stað inn í teiginn og því þurfti að endurtaka spyrnuna. Benzema tók þá vítið og skoraði.