„Fari þessi leikhópur til andskotans“

Þórdísi Björk Þorfinnsdóttur, sem er meðlimur í leikhópnum Lotta, tókst að móðga landsbyggðina, einkum á norðaustanverðu landinu svo mjög að nú er hvatt til sniðgöngu á sýningum hópsins á Bakkabræðrum.

Þórdís skrifaði orðsendingu Instagram-síðu sína sem hafa fallið í afar grýttan jarðveg svo ekki sé meira sagt.

„Jæja þá erum við búin að koma á helv.. Kópasker,“ skrifar Þórdís og sparar sig hvergi: „Keyrðum á Kópasker og Raufarhöfn bara til að geta krossað það út af listanum, mæli alls ekki með að koma hingað, bara alls alls ekki gera það.“

Þórdís Björk hefur nú tekið þessi umdeildu ummæli niður en það breytir ekki því; netið gleymir engu.

Auðmjúk afsökunarbeiðni frá leikhópnum

Þessi orðsending hefur farið afar illa í íbúa á Melrakkasléttu sem og víðar á landsbyggðinni. Leikhópurinn hefur sent út sérstaka afsökunarbeiðni vegna ummælanna. Og notar hástafi til að undirstrika hversu leitt þeim þykir hvernig komið er.

FYRIRGEFIÐ ELSKU VINIR OKKAR Á RAUFARHÖFN, KÓPASKERI OG ALLIR HINIR.

Þar segir að Lotta vilji taka sérstaklega fram að þau elski Ísland og alla þá dásamlegu staði sem þau ferðumst á.

„Sá leiði atburður átti sér stað að svartur og illskiljanlegur „húmor“ hjá litlu Lottunni okkar henni Dísu, sem hún birti á sínum persónulega reikningi, fór í dreifingu. Þar skrifaði hún inná myndir af sér skælbrosandi og skreyttar broskörlum:

„Jæja, þá erum við búin að koma á helv Kópasker“ og „Keyrðum á Kópasker og Raufarhöfn bara til að geta tékka það af listanum, mæli alls ekki með að koma hingað, bara alls alls ekki gera það“.

Slík ummæli eru alls ekki viðeigandi hvernig sem þau eru meint og ekki í anda Lottu, enda ekki frá hópnum komin. Sem betur fer sagði Dísa líka fallega og sanna hluti úr ferðalaginu,“ segir meðal annars í yfirlýsingu frá hópnum.

Þetta er ekki í fyrsta skipti sem leikhópurinn Lotta lendir í honum kröppum á samfélagsmiðlum.

Fyrir þremur árum sætti hópurinn mikilli gagnrýni fyrir lag í sýningunni þeirra Ljóti andarunginn. Lagið sem um ræðir heitir Danssleikur og hafa femínistar verið meðal þeirra sem gagnrýna texta lagsins og segja hann óviðeigandi og klúran; að hann hlutgeri konur og viðhaldi bjagaðri hugsun.

Athugasemdakerfið logar

DV greindi frá athugasemd Þórdísar Bjarkar í gær og athugasemdakerfið logar. Þar vilja ýmsir meina að þessi afsökunarbeiðni sé einskis virði og hvatt er til þess að fólk á landsbyggðinni sniðgangi Lottu. „Fari þessi leikhópur til andskotans,“ segir einn en það er í takti og stíl við annað sem sagt er.

Vísir heyrði í sveitarstjóra Norðurþings, Kristjáni Þór Magnússyni, en honum hafði verið bent á þessi ummæli Þórdísar Bjarkar af íbúa Kópaskers. Sem var hreint ekki skemmt.

„Nei, þetta er helst til langt gengið,“ segir Kristján Þór sem þó vill ekki gera of mikið úr málinu. Telur þetta dæma sig sjálft. Komin sé fram yfirlýsing frá leikhópnum vegna málsins.

„Þegar galsinn yfirtekur menn á samfélagsmiðlum getur farið illa. Lotta hefur verið dugleg að koma til dæmis til Húsavíkur og þetta eru flottar sýningar hjá þeim. Ég treysti því að þetta séu ekki almenn viðhorf. Einhver galsi sem hefur gripið ungdóminn. Menn tjá sig ekki allajafna svona.“

Landsbyggðin viðkvæmari fyrir háði og spotti

En, er landsbyggðafólk ekki ofurviðkvæmt fyrir háði og spotti af þessu tagi?

„Jú, það getur vel verið. Menn hafa upplifa sig í varnarbaráttu. Eðlilega. Fólki fækkar, minnkandi þjónusta víða og þá er oft stutt inn í kviku á mönnum. Mega ekki við miklu, að fá óvægna gagnrýni. Það er rétt. Þá er eins og verið sé að ráðast á alla.“

Kristján Þór segir þetta upplifun margra, fólki þyki vænt um heimabæinn og á Íslandi eru allir úr einhverju þorpi. Ekki þarf að fara margar kynslóðir aftur til að rata í sveitina.

„Þarf oft ekkert mikið til. Í stærðinni í Reykjavík eru færri sem taka upp hanskann. Það er ekkert endilega minna um að fólk utan að landi sé að bölsótast út í höfuðborgina. En þetta verður persónulegra þegar þú ert kominn á minni staði. Ég treysti því að þetta unga fólk það vandi sig betur þegar menn hafa fengið að kenna á svona.“

Kristján Þór vonar að þetta jafni sig: „Vil ekki trúa að þetta séu almenn viðhorf leikara hjá Lottu. Menn hafa bara gleymt sér í einhverju rugli og læra af þessu.“