Kalt heim­skauta­loft flæðir yfir landið

Kalt heimskautaloft flæðir í dag yfir landið og það frystir. Éljabakkar sækja að landinu úr norðri og vestri og geta akstursskilyrði orðið erfið í éljunum. Suðausturland og Austfirðir sleppa að miklu leyti við úrkomuna í dag.

Þetta kemur fram í hugleiðingum veðurfræðings á vef Veðurstofunnar. Er spáð norðan- og norðvestan 10 til 18 metrar á sekúndu með morgninum. Él, einkum norðan- og vestanlands. Fer veður kólnandi með frosti 3 til 10 stigum seinnipartinn.

„Á morgun (föstudag) er útlit fyrir hvassa norðvestanátt með snjókomu á Norður- og Austurlandi og gæti hríðin orðið nokkuð dimm á þeim slóðum þegar verst lætur. Sunnan heiða er útlit fyrir bjartan dag en kaldan. Vestasti hluti landsins (þar með talið höfuðborgarsvæðið) sleppur einnig við vindinn að þessu sinni.

Á föstudagskvöld hefur veðrið gengið niður og það herðir á frostinu, þá gætu tveggja stafa frosttölur verið að mælast í öllum landshlutum. En þau rólegheit standa ekki lengi því á laugardag er útlit fyrir að gangi í suðaustan storm með hlýnandi veðri. Úrkoman sem fylgir verður líklega snjókoma til að byrja með, en færir sig síðan yfir í slyddu eða rigningu.

Það gengur sem sagt á ýmsu næstu daga og veðrið getur haft áhrif á ferðalög, sérílagi ef förinni er heitið milli landshluta,“ segir í hugleiðingum veðurfræðings.