Fjórða jafntefli Arsenal í röð kom á Turf Moor

Gengi Arsenal er vægast sagt skelfilegt um þessar mundir en liðið gerði sitt fjórða jafntefli í röð er það mætti Burnley á Turf Moor í dag. Leiknum lauk með markalausu jafntefli og Arsenal því aðeins unnið tvo af síðustu 17 leikjum sínum.

Leikurinn var ekki mikið fyrir augað en Pierre Emerick-Aubameyang fékk besta færi gestanna í fyrri hálfleik en skaut framhjá úr fínu færi. Staðan markalaus í hálfleik og þannig var hún allt til loka.

Jay Rodriguez fer eflaust ekki sáttur á koddann en hann fékk dauðafæri undir lok leiks þegar hann setti knöttinn í slá og niður á línu úr sannkölluðu dauðafæri. Hefði Burnley þar með geta stolið stigunum þremur.

Annars var leikurinn vægast sagt leiðinlegur frá upphafi til enda og markalaust jafntefli eflaust sanngjörn niðurstaða.

Arsenal eru áfram í 10. sæti deildarinnar með 31 stig eftir 25 leiki. Burnley, sem lék án Jóhanns Bergs Guðmundssonar í dag, er sæti neðar með jafn mörg stig en lakari markatölu.