Úr­koman verður helsti ­ó­vissu­þátturinn í höfuð­borginni

Sprengilægðin sem ganga á yfir landið í nótt og á morgun verður fyrr á ferðinni en fyrstu spár gerðu ráð fyrir. Aðalóvissuþátturinn á höfuðborgarsvæðinu verður úrkoman. Þá eru viðbragðsaðilar betur undirbúnir en í síðustu sprengilægð.

Þetta kom fram í máli Rögnvalds Ólafssonar, aðalvarðstjóra hjá almannavarnadeild ríkislögreglustjóra, í útvarpsþættinum Reykjavík síðdegis á Bylgjunni.

Viðvaranir Veðurstofunnar vegna aftakaveðurs morgundagsins voru færðar upp á rautt stig á fjórum landsvæðum í dag; höfuðborgarsvæðinu, Faxaflóa, Suðurlandi og Suðausturlandi. Á rauðu svæðunum verður austan ofsaveður, rok eða jafnvel fárviðri. Hætt er við foktjóni og eru byggingaraðilar hvattir til að ganga vel frá framkvæmdarsvæðum.

„Vindur er svo sem alltaf vindur“

Þá hafa almannavarnir fundað með forstöðumönnum raforku- og fjarskiptakerfa, sem og Vegagerðinni og björgunarsveitum í dag. Nokkuð bar á gagnrýni í garð þeirra sem halda utan um þessa helstu innviði þegar sprengilægðin gekk yfir 10. og 11. desember í fyrra. Þá urðu til að mynda víðtækar og lamandi skemmdir á dreifikerfi rafmagns.

Rögnvaldur segir alla tilbúna í slaginn og þá sé það hans tilfinning að fólk sé betur undirbúið nú en síðast.

„Já, ég upplifi það þannig að fólk sé meira á tánum núna. Það er búið að gera ráðstafanir um að manna töluvert mikið í raforkugeiranum, það verða vinnuflokkar úti og tilbúnir til starfa, á mikilvægum tengipunktum og annað, þar sem menn búast við að geti orðið vesen með rafmagnið.“

Rögnvaldur segir aðspurður að búast megi við „mjög vondu veðri“ en samkvæmt spám er gert ráð fyrir að það hvessi smám saman í kvöld og nótt, fyrst á Suðurlandi. Veðrið verði orðið einna verst í fyrramálið og gangi ekki niður að fullu fyrr en á laugardag.

„Eins og gagnvart höfuðborgarsvæðinu er aðalóvissuþátturinn hjá okkur varðandi úrkomuna, hvort hún verði mikil, því vindur er svo sem alltaf vindur eins og maður segir. En ef það er mikil úrkoma og mjög blint þá getur verið mjög erfitt að ferðast hérna um,“ segir Rögnvaldur.

Byrjar fyrr en fyrst var talið

Þá segir hann að óveðurspárnar nú hafi að mestu leyti gengið eftir.

„Spár eru alltaf spár en það sem er merkilegt við þessa spá er að þetta var komið í kortin fyrir nokkrum dögum síðan og er búið að haldast nokkuð í hendur við það hvernig þróunin hefur verið. Það sem spáin hefur sagt hefur nokkurn veginn ræst hingað til.“

Nú líti þó út fyrir að óveðrið verði fyrr á ferðinni en útlit var fyrir í fyrstu.

„Sem er kannski jákvætt að ákveðnu leyti, sérstaklega kannski fyrir suðvesturhornið. Þá byrjar þetta fyrr og gengur líka hraðar yfir en fyrst var gert ráð fyrir.“

Samhæfingarmiðstöð almannavarna í Skógarhlíð verður virkjuð á miðnætti vegna veðurs. Hún verður starfandi í sólarhring, eða þangað til á miðnætti annað kvöld. Rögnvaldur mælir með því að þeir sem tök hafi á haldi sig heima og taki því rólega á meðan veðrið gengur yfir.

Fylgjast má með nýjustu tíðindum af veðrinu í veðurvakt Vísis hér.