Endurnýttu kjólana til að vekja athygli á umhverfismálum

Að minnsta kosti tvær leikkonur mættu á Óskarsverðlaunin í gær, klæddar í kjóla sem þær hafa áður mætt í á verðlaunahátíð. Þetta gerðu þær vegna umhverfissjónarmiða. Fleiri leikkonur völdu „grænni“ kosti fyrir viðburðinn vöktu þessar leikkonur athygli á umhverfisbaráttunni, loftslagsbreytingum, sjálfbærni og endurnýtingu.

Jane Fonda kynnti síðustu verðlaun kvöldsins þegar tilkynnt var að Parasite var valin besta kvikmyndin. Fonda sendi skýr skilaboð með fatavali sínu fyrir þetta verkefni. Hún var í kunnuglegum rauðum Elie Saab kjól, sem hún notaði einnig á Cannes kvikmyndahátíðinni árið 2013. Var hún einnig með rauða kápu, sem hún hafði áður gefið út að væri síðasta flíkin sem hún myndi nokkurn tíman kaupa.

Kápan vakti athygli þegar Fonda var handtekin í fjórða skipti á mótmælum vegna loftlagsmála. Þá var haft eftir henni að við þyrftum ekki að halda áfram að versla.

„Við þurfum ekki meira, ég þarf að standa við stóru orðin, svo ég ætla ekki að kaupa meira af fötum.“

Valdi hún einnig skartgripi frá fyrirtækjum sem er annt um umhverfið. Leikkonan hefur hingað til alltaf litað hár sitt ljóst en í gær steig hún á svið með styttri klippingu og leyfði fallega gráa hárinu sínu að njóta sín. Fonda er 82 ára gömul og leikur nú í Netflix þáttunum Frankie and Grace.

Elisabeth Banks mætti á Óskarsverðlaunin í eldrauðum kjól sem hún klæddist líka í Vanity Fair Óskarspartýinu árið 2004. Á Instagram útskýrði leikkonan að hún væri stolt af því að klæðast aftur þessum Badgley Mischa kjól, til að vekja athygli á sjálfbærni í tísku, endurnýtingu og neysluhyggju í tengslum við loftlagsbreytingar, mengun hafsins og framleiðsluhætti.

Margot Robbie var tilnefnd til Óskarsverðlauna fyrir leik sinn í Bombshell og valdi hún að klæðast tveimur samsettum Chanel kjólum frá 1994. Kaitlyn Dever klæddist algjörlega sjálfbærum kjól frá Louis Vuitton, í samstarfi við Red Carpet Green Dress samtökin, sem hvetja stjörnur til að velja fatnað sem góður er fyrir umhverfið.  Dever sagði að málefnið væri „mjög mikilvægt.“ Bað hún fólk að hugsa sig vel um áður en keyptar eru nýjar flíkur og hvatti fólk til að kaupa notuð föt.

Fleiri nýttu tækifærið til að vekja athygli á mikilvægum málefnum á Óskarnum í nótt. Leikarinn Joaquin Phoenix, sem hreppti Óskarinn fyrir besta leik í aðalhlutverki fyrir hlutverk sitt í kvikmyndinni Joker, lagði áherslu á dýravelferð í sinni ræðu.