Fylkiskonur fimm sætum ofar þökk sé hinni sautján ára gömlu Cecilíu

Frammistaða Cecilíu Rán Rúnarsdóttur í Fylkismarkinu í sumar á mikinn þátt í því að Árbæjarliðið er meðal efstu liðanna en ekki meðal þeirra neðstu.

Fylkiskonur eiga nefnilega mjög góðan leikmann í hinni sautján ára gömlu Cecilíu Rán og þetta sýnir tölfræðin vel. Varnarmennirnir eiga vissulega mikinn þátt í þessu líka en það er Cecilíu Rán sem er að koma í veg fyrir mörkin með því að verja frá mótherjum í dauðafærum.

Cecilía Rán Rúnarsdóttir átti stórleik í marki Fylkis á Selfossi á sunnudaginn þegar Fylkiskonur tóku með sér öll þrjú stigin þrátt fyrir að hafa átt erfitt uppdráttar stóran hluta leiksins. Fylkir vann leikinn á endanum 1-0 þökk sé marki Bryndísar Örnu Níelsdóttur í uppbótatíma.

Wyscout tekur saman ítarlega tölfræði úr Pepsi Max deildunum fyrir KSÍ og félögin en þar kemur oft ýmislegt fróðlegt fram.

Wyscout er meðal annars með XG-tölfræðina sína sem við höfum þýtt markalíkur á íslensku. Út frá því eru síðan reiknuð úrslit leikja og þar sem stigin sem félögin hafa í raun átt skilið úr sínum leikjum.

Gæði marktækifæra liðanna er metið út frá ákveðnum reglum og út frá því eru síðan reiknaðar markalíkur eða hversu mörg mörk liðið hefði átt að skora í viðkomandi leik.

Samkvæmt markalíkunum úr leiknum á Selfossi á sunnudaginn þá áttu Selfosskonur að skora 3,75 mörk í leiknum en þær skoruðu ekki neitt.

Þetta er enn eitt dæmið um leik hjá Fylkisliðinu í sumar þar sem liðið nær stigum út úr leik þar sem andstæðingarnir skapa sér mun fleiri færi.

Fylkiskonur treysta mikið á hina sautján ára gömlu Cecilíu Rán Rúnarsdóttir í markinu og hún er vissulega búin að koma í veg fyrir mörg mörk í sumar.

Fylkisliðið komst upp í þriðja sætið með sigrinum á Selfossi. Samkvæmt markalíkunum þá ætti Árbæjarliðið hins vegar að vera aðeins í áttunda sæti. Selfoss, Stjarnan, Þór/KA, Þróttur og KR ættu því öll að vera ofar í töflunni en Fylkir ef að sköpuð marktækifæri myndu ráða.

Fylkiskonur hafa fengið 8,1 fleiri stig en þær hafa átt að fá og Fylkisliðið ætti að vera búið að fá á sig meira en sjö mörkum meira. Stigin eru 15 en ættu að vera 6,9. Markatalan er 12-11 en ætti að vera 9,2-18,3. Markatalan er +1 en ætti í raun að vera -9,1.

Leikur Breiðabliks og Þór/KA hefst klukkan 18.00 í kvöld en hann verður sýndur beint á Stöð 2 Sport 3. Á sama tíma fer fram leikur Fylkis og ÍBV í Árbænum en hann verður sýndur beint á Vísi. Engir áhorfendur eru leyfðir á leikjunum vegna sóttvarnarreglna.