Golden State morðinginn í lífstíðarfangelsi

Hinn 74 ára gamli Joseph DeAngelo, sem einnig er þekktur sem Golden State morðinginn, var í dag dæmdur í lífstíðarfangelsi án möguleikans á reynslulausn.

Í lok júní játaði DeAngelo á sig 13 morð, fjölda nauðgana, innbrot og fleiri glæpi fyrir dómi í Sacramento. Játning hans var liður í samkomulagi við ákæruvaldið sem ætlað var að forða honum frá dauðarefsingunni.

Brot DeAngelo voru framin á árunum 1976 til 1986 og voru sum óleyst í meira en 40 ár. DeAngelo var handtekinn árið 2018, þá 72 ára, grunaður um minnst fjögur morðanna.

Sagðist þykja þetta leitt

DeAngelo hlýddi á framsögur aðstandenda þeirra sem hann myrti áður en dómur yfir honum var kveðinn upp. Að því loknu sagði hann að honum þætti leitt að hafa sært fólk.

„Ég hef hlustað á framsögur ykkar, hverja einu og einustu, og mér þykir sannarlega fyrir því að hafa sært fólk.“