Raiola staðfestir að Pogba verði áfram hjá Man Utd

Samkvæmt Mino Raiola, umboðsmanni Frakkans Paul Pogba, verður leikmaðurinn áfram í herbúðum Manchester United á komandi tímabili.

Pogba hefur lengi verið orðaður burt frá rauða liðinu í Manchester og Real Madrid nefnt sem líklegur áfangastaður. 

Nú lítur hinsvegar allt út fyrir að Pogba sé ekki á förum, en miðjumaðurinn kom aftur inn í byrjunarlið Man Utd í júní og spilaði síðustu tíu leikina eða svo í ensku úrvalsdeildinni eftir að hafa verið meiddur nánast allt tímabilið. Hann og Portúgalinn Bruno Fernandes þykja ná vel saman á miðjunni hjá Rauðu djöflunum.

„Pogba verður áfram hjá Manchester United. Hann er lykilleikmaður hjá liðinu, þeir eru í mikilvægu ferli og hann er 100% þátttakandi í því. Man Utd mun ekki samþykkja nein tilboð í leikmanninn í sumar. Við munum ræða nýjan samning fljótlega, engar áhyggjur,“ sagði Raiola við Sky Sport Italia.