Nýrri göngu­brú yfir Reykja­nes­braut komið á sinn stað

Ný göngubrú yfir Reykjanesbraut var hífð á stöpla sína við Ásland í Hafnarfirði í morgun. Veginum var lokað milli Kaldárselsgatnamóta og Strandgötubrúar á meðan brúin var hífð á sinn stað.

Vegagerðin segir frá því á vef sínum að framkvæmdin hafi gengið framar vonum.

„Gatan var lokuð klukkan 9.30 en þá hafði staðið yfir um klukkutíma undirbúningur. Innan við tuttugu mínútur liðu frá því kraninn fór á loft og þar til boltar höfðu verið festir.

Reykjanesbrautin var lokuð til klukkan 13 meðan fjarlægðar voru þungar umferðarvarnir af götunni,“ segir á vefnum.