Vilja íbúakosningu fyrir endanlega afgreiðslu

Bæjarstjórn Akureyrarbæjar hefur samþykkt að auglýsa aðalskipulagsbreytingu fyrir hluta Oddeyrar þar sem hugmyndir eru uppi um að byggja 100-150 íbúðir. Fulltrúar Sjálfstæðisflokksins í bæjarstjórn vilja halda íbúakosningu um málið áður en það verður endanlega afgreitt, síðar meir í skipulagsferlinu.

Fjallað hefur verið um málið ítarlega í fjölmiðlum frá því að fyrstu hugmyndir um uppbyggingu litu dagsins ljós. Þær gerðu ráð fyrir hærri byggingum en nú er ráðgert, en skipulagsráð bæjarins hefur lagt til að nýjar byggingar á reitnum verði ekki hærri en 25 metrar yfir sjávarmáli, allt að sex til átta hæðir eftir útfærslu, í stað fimm til ellefu samkvæmt fyrstu hugmyndum.

Umræddur reitur afmarkast af Hjalteyrargötu í vestri, Kaldbaksgötu í austri, Gránufélagsgötu í norðri og Strandgötu í suðri sem nú er að mestu athafnasvæði, fyrir utan eina einbýlishúsalóð. 

Umræðuna um málið á fundi bæjarstjórnar í gær má sjá hér að neðan. Umræðan hefst þegar um átta mínútur eru liðnar.

Bæjarstjórn tók málið fyrir á fundi sínum í gær þar sem tillagan var samþykkt með níu atkvæðum gegn einu atkvæði fulltrúa VG. Fulltrúi Miðflokksins sat hjá. Fulltrúar Sjálfstæðisflokksins samþykktu tillöguna en létu einnig bóka að aðalskipulagsbreytingin verði ekki afgreitt nema að undangenginni íbúakosningu.

Telja málið henta vel í íbúakosningu

Í samtali við Vísi segir Gunnar Gíslason, oddviti Sjálfstæðisflokksins, að málið sé að mörgu leyti tilvalið í íbúakosningu, það sé ágæt leið til að fá fram hver vilji bæjarbúa sé varðandi framtíð þessa svæðis.

„Við vitum í rauninni ekkert um það þótt að það sé komnir 1.900 til 2.000 manns á einhvern Facebook-lista hver raunverulegur vilji bæjarbúa er. Þannig að við teljum að þetta sé ágætis mál í íbúakosningu,“ segir Gunnar og vísar þar í Facebook-hóp sem spratt upp síðastliðið föstudagskvöld þar sem þeim hugmyndum sem liggja til grundvallar fyrirhugaðri uppbyggingu er mótmælt.

„Hvaða hugmyndir hefur fólk um það hvernig Eyrin á að líta út til framtíðar? Vilja menn hafa þarna lágreista byggð heilt yfir eða má þetta fara eitthvað hærra?,“ segir Gunnar að auki.

Hvar er málið statt?

Sem fyrr segir stendur skipulagsvinnan nú yfir. Drög að breytingum voru fyrst kynntar í vor og eftir að fjölmargar athugasemdir bárust var afgreiðslu málsins frestað í sumar. Eftir viðræður við fulltrúa hverfisnefndar Oddeyrar, eigendur mannvirkja á svæðinu og þróunaraðila, sem er verktakafyrirtækið SS Byggir, samþykkti skipulagsráð að leggja til við bæjarstjórn að tillagan yrði auglýst í samræmi við skipulagslög.

Eftir að bæjarstjórn samþykkti tillögun verður hún send Skipulagsstofnun til yfirferðar. Geri stofnunin ekki athugasemd við tillöguna verður hún auglýst í sex vikur.

Þá gefst hagsmunaðilum, stofnunum og öðrum tækifæri til þess að gera athugasemdir við tillöguna. Að því loknu verður tillagan tekin til umfjöllunar í skipulagsráði og bæjarstjórn, auk þess sem að afstaða verður tekin til hugsanlegra breytinga á tillögunni og athugasemda. Þá fá þeir sem sendu inn athugasemdir umsagnir um athugasemdirnar frá skipulagsyfirvöldum.

Umrætt skipulagsferli sem nú er í gangi má sjá hér fyrir neðan en eftir að bæjarstjórn samþykkti að auglýsa tillöguna er skipulagsferlið nú í þrepi fjögur, sem er rauðmerkt.