Kórónuveirusmit á ritstjórn Morgunblaðsins

Starfsmaður Árvakurs hefur greinst smitaður af kórónuveirunni. Samkvæmt heimildum fréttastofu kom smitið upp á ritstjórn Morgunblaðsins og mbl.is.

Starfsfólk mun hafa fengið sendan tölvupóst á sjöunda tímanum í kvöld þar sem greint er frá því að starfsmaðurinn hafi greinst með covid-19 og að gripið verði til viðeigandi ráðstafana.

 Þetta er ekki í fyrsta sinn sem tilfelli kórónuveirunnar kemur upp hjá ritstjórn fjölmiðils hérlendis en áður hafa til að mynda borist fréttir af tilfellum kórónuveirusmits á ritstjórnum Fréttablaðsins, DV og Ríkisútvarpinu.