Ísbúðir fá á baukinn vegna skorts á upplýsingum

Ísbúðirnar Brynjuís, Huppa, Joylato, Hafís og Eldur & ís hafa gerst brotleg við lög um rafræn viðskipti og aðra rafræna þjónustu með ófullnægjandi upplýsingagjöf um þjónustuveitanda á vefsíðum sínum. Þetta kemur fram á vef Neytendastofu.

Þar segir að í júní hafi Neytendastofa gert könnun á sölustað og vefsíðum ísverslana hér á landi. Miðaði könnunin að því að skoða hvort verðskrá væri sýnileg á sölustöðum og hvort veittar væru upplýsingar um þjónustuveitanda á vefsíðum ísbúðanna.

Allar ísbúðir sem skoðaðar voru virðast standa sig í verðmerkingum í verslunum sínum. Hins vegar gerði Neytendastofu í júní athugasemd við fyrrnefndar fimm ísverslanir þar sem ekki var að finna upplýsingar á vefsíðum ísbúðanna um þjónustuveitanda.

Samvkæmt lögum um rafræn viðskipti skal þjónustuveitandi greina á vefsíðu frá nafninu sínu, heimilisfangi, kennitölu, póst eða netfangi, virðisaukaskattsnúmeri, þeirri opinberu skrá sem hann er skráður hjá og að síðustu leyfi og eftirlitsaðila sé starfsemin háð leyfum.

Ísverslanirnar fimm höfðu ekki brugðist við tilmælunum við ítrekun í ágúst. Í ákvörðun Neytendastofu segir að ísverslanirnar hafi tvær vikur til að bæta úr þessu. Ella verði lagðar dagsektir að fjárhæð 20 þúsund krónur á fyrirtækin.

Lausleg skoðun blaðamanns á heimasíðum fyrrnefndra verslana leiddi í ljós að Huppa og Hafís virðast þegar hafa orðið við tilmælum Neytendastofu.