„Pylsukóngurinn“ myrtur með lásboga í gufubaði

Óþekktir menn brutust inn á heimili auðjöfurs í kjötvinnslu og skutu hann til bana með lásboga í gufubaði skammt frá Moskvu í nótt. Mennirnir eru sagðir hafa reynt að kúga fé út úr húsráðandanum sem var þekktur sem „Pylsukóngurinn“ í Rússlandi.

Rússneska rannsóknalögreglan hefur ekki greint frá nafni þess myrta en þarlendir fjölmiðlar halda því fram að það sé Vladímír Marúgov, eigandi Ozorskí-pylsna og Kjötveldisins, tveggja pylsuverksmiðja, að sögn Reuters-fréttastofunnar.

Árásarmennirnir eru sagðir hafa hneppt Marúgov og konu í gíslingu, bundið þau og krafið hann um fé. Konunni hafi tekist að flýja og gera lögreglu viðvart. Þegar lögreglumenn bar að garði var Marúgov látinn.

Lögreglan segist hafa fundið lásbogann sem var notaður til að myrða auðkýfinginn og flóttabíl morðingja hans í þorpi vestur af Moskvu þar sem margir vel stæðir Rússar eiga sveitasetur.