Hátíðarvegansteik sem gefur Beef Wellington ekkert eftir

Allt frá klassískum uppstúf, sykurbrúnuðum kartöflum og gljáa á hrygginn yfir í nýjar hugmyndir, líkt og vegan lausnir, Ketó jól, 12 tíma graflax og fleira.

Áherslan er sett á stóru smáatriðin sem fullkomna matinn um hátíðirnar.

Í fimmta þættinum fer Júlía Sif yfir það hvernig maður reiðir fram vegan hátíðarsteik sem gefur Beef Wellington ekkert eftir.

Hér að neðan má sjá þáttinn í heild sinni.

Hér að neðan er hægt að fara yfir uppskriftina sjálfa:

Lítil steik fyrir 2-3

● 1 askja Sveppir, helst portobello eða kastaníu

● 2 skalotlaukar

● 1 Hvítlaukur

● 2-3 stilkar ferskt timian

● 50 gr Vegan smjör eða smjörlíki

● 1 pakki vegan hamborgarar frá merkinu Anamma

● 1 msk dijon sinnep (passa að það innihaldi ekki hunang)

● Ólífuolía

● Salt og pipar

● 1 rúlla eða 2 plötur vegan smjördeig

● 2 msk af vegan rjóma eða plöntumjólk

Aðferð:

Byrjið á því að setja laukana, sveppina, 1 hvítlauksrif, eina matskeið af fersku eða þurrkuðu timiani og smá salt og pipar í blandara eða matvinnsluvél og vinnið saman þar til það verður að frekar sléttu mauki sem hægt er að smyrja.

Þýðið hamborgara, hrærið þeim saman og mótið í fallega steik.

Bræðið smjörið á pönnu, kremjið restina af hvítlauknum og setjið út á pönnuna ásamt tveimur stilkum af timiani. Leyfið þessu að hita og steikið hamborgarasteikina síðan upp úr smjörinu þar til hún verður fallega gyllt á öllum hliðum.

Fletjið smjördeigið út eða klípið saman tvær plötur ef notast er við slíkt deig. Smyrjið sveppamaukinu á smjördeigið. Penslið allar hliðar steikarinnar með dijon sinnepi og bakkið síðan inn í smjördeigið og skerið í það munstur. Smyrjið deigið með smá vegan rjóma eða mjólk og bakið í 210 gráðu heitum ofni í u.þ.b. 30 mínútur eða þar til steikin er orðin fallega gyllt að utan.

Steikin hentar vel með hefðbundnu hátíðar meðlæti.