Útsendarar FSB sagðir hafa eitrað fyrir Navalní

Fimm aðrir menn á vegum FSB eru sagðir hafa stutt mennina þrjá og einhverjir þeirra fóru jafnvel einnig til Omsk, þar sem Navalní var lagður inn á sjúkrahús.

Þetta kemur fram í niðurstöðum rannsóknar samtakanna Bellingcat og rússneska fjölmiðilsins The Insider sem gerð var í samvinnu við Der Spiegel og CNN. Rannsóknarteymið mun hafa komist yfir mikið magn síma- og ferðagagna.

Navalní, sem hefur verið áberandi í stjórnarandstöðu í Rússlandi undanfarin ár, veiktist í flugvél yfir Síberu þann 20. ágúst. Flugvélinni var lent og hann var fluttur á sjúkrahús í Omsk.

Navalní féll í dá féll í dá og grunaði aðstandendur hans strax að eitrað hefði verið fyrir honum. Nokkrum dögum síðar var Navalní fluttur á sjúkrahús í Berlín. Vísindamenn í Þýskalandi, Svíþjóð og Frakklandi, auk vísindamanna Efnavopnastofnunarinnar, hafa staðfest að eitrað var fyrir Navalní með novichok, eitrið sem þróað var í Sovétríkjunum.

Navalní sjálfur hefur staðhæft að Vladimír Pútín, forseti Rússlands, beri ábyrgð á tilræðinu. Yfirvöld í Rússlandi þvertaka þó fyrir það. Sergei Lavrov, utanríkisráðherra Rússlands, sagði í síðasta mánuði að ekkert eitur hefði fundist í Navalní, þegar hann var á sjúkrahúsi þar, og að líklegast hafi taugaeitrið borist í hann þegar verið var að flytja hann til Þýskalands.

Sjá einnig: Segir Rússa gruna að eitrað hafi verið fyrir Navalní á leið til Þýskalands

Útsendarar FSB eru sagðir hafa byrjað að fylgja Navalní árið 2017, þegar hann tilkynnti fyrst að hann ætlaði að bjóða sig fram til forseta Rússlands. Gögn sýna að síðan þá hafi meðlimir sveitar FSB, sem sérhæfa sig í meðhöndlun eiturefna, hafa elt Navalní og minnst þrjátíu sinnum hafa meðlimir sveitarinnar deilt flugvél með honum.

Áðurnefnd rannsókn sýndi fram á að margir mannanna sem hafa verið að fylgjast með Navalní starfa hjá rannsóknarstofnun FSB, þar sem talið er að eitur séu þróuð, samkvæmt frétt Guardian.

Bellingcat segir að þar séu eiturefni þróuð og að í raun hafi efnavopnaáætlun Rússlands verið færð undir stofnunina í leyni. Henni sé stýrt af sérfræðingi í efnavopnum og þar starfi aðrir sérfræðingar, læknar og njósnarar.

Stofnunin tengd við morð Litvinenko

Yfirvöld í Bretlandi höfðu árið 2016 tengt þá stofnun við morð Alexander Litvinenko, fyrrverandi útsendarar FSB sem var myrtur í London árið 2006 með geislavirku tei.

Bretar hafa rakið morðið til Pútíns og hafa sakað tvo útsendara FSB um það.

Þá hafa Bretar einnig sakað tvo útsendara GRU, leyniþjónustu rússneska hersins, um að hafa eitrað fyrir öðrum fyrrverandi starfsmanni GRU, Sergei Skripal, í Salisbury árið 2018.

Þá komust rannsakendur Bellingcat að þeirri niðurstöðu að mennirnir tveir störfuðu hjá GRU, og var það svo staðfest af yfirvöldum Bretlands.

Navalní hefur tjáð sig um rannsóknina í löngu myndbandi á Youtube. Þar segir hann að svona aðgerð gæti ekki verið framkvæmd án samþykkis Pútíns. Hann segir einnig í myndbandinu að hann telji sig nú vita hvenær eitrað var fyrir honum.

Kvöldið áður en hann veiktist hafði hann fengið sér kokteil á hóteli en þótt bragðið af honum svo undarlegt að hann tók einungis nokkra sopa.

Samkvæmt miðlunum sem koma að rannsóknin sína símagögn að það kvöld áttu þessir meintu útsendarar FSB í miklum samskiptum.