Arteta hefur beðið Arsenal að hafa samband við Real Madrid og Lyon

Arteta er sagður vilja styrkja sóknarleikinn hjá félaginu og fá sóknarþenkjandi miðjumann inn. Því er Edu, yfirmaður knattspyrnumála hjá félaginu, sammála.

„Það er ljóst hvað við þurfum. Við þurfum leikmann inn á miðjuna með sköpunargáfu og við höfum þann leikmann ekki hjá félaginu núna,“ sagði Edu.

„Ég er Brasilíumaður og ég er mjög opin. Ég er ekki hræddur við að segja hlutina eins og þeir eru. Okkur líður ekki vel að vera í þessari stöðu sem við erum í en allir eru í einhverjum vandræðum.“

Spænski miðillinn Defensa Central hefur það eftir heimildum sínum að Arteta hafi Isco, hjá Real Madrid, og Houssem Aouar, hjá Lyon, efst á óskalista sínum.

Félagið hefur þó bara efni á einum þeirra því liðið gæti þurft að punga út stórri summu fyrir Aouar og er svo launapakki Isco ansi hár.

Arsenal mætir Everton á útivelli í dag en Gylfi Þór Sigurðsson og félagar hafa unnið tvo leiki í röð.