Seyðfirðingar sneru heim í dag: „Mann langar bara að vera heima hjá sér“

Þeir íbúar sem búa utan áhættusvæða fengu að snúa aftur heim klukkan 14.30 í dag, eftir að ofanflóðasérfræðingar Veðurstofunnar og Almannavarnir gáfu út tilkynningu þess efnis. Um er að ræða tuttugu og tvær götur og þrjá bæi. Ekki er vitað hvenær aðrir fá að fara aftur heim því enn er hætta á frekari skriðuföllum og bærinn á neyðarstigi. Þá hefur rýmingu á Eskifirði einnig verið aflétt.

„Það er bara geggjað, það er auðvitað sorg út af þessu sem gerðist en við erum búin að vera í ofsalega góðu yfirlæti á Egilsstöðum og erum ævinlega þakklát fyrir þetta,“ segja Guðjón Harðarson og Hrönn Ólafsdóttir, íbúar á Seyðisfirði.

„Það er bara geggjað, mann langar bara að vera heima hjá sér,“ segir Brynjar Skúlason, íbúi.

„Það er ofsalega leiðinlegt að það fái ekki allir að fara heim. Og kannski ekki allir tilbúnir heldur til að fara heim,“ segir Margrét Guðjónsdóttir, íbúi.

Sumir komu að lokuðum dyrum þegar heimilisfang þeirra var ekki á lista yfir opnar götur.

„Já, ég er mjög leið. Ég get ekki beðið eftir að fara og sjá hvort allt… Auðvitað er ekki allt í lagi en vonandi…“ segir Eva Magyan, íbúi á Seyðisfirði.

„Menn eru með tilfinningar fyrir þessu öllu en það sekkur inn og við verðum bara að vinna úr því. Nú er bara að byggja upp. Við stólum á stjórnmálamennina til að hjálpa okkur í því,“

Tvö hundruð fóru til Seyðisfjarðar í dag

Björgunarsveitarmenn hafa í dag staðið við lokunarpósta við Fjarðarheiði þar sem þeir hafa skráð nafn hvers og eins sem hefur farið þar í gegn. Því starfi lauk rétt fyrir kvöldfréttir.

Hjalti Bergmar Axelsson, aðstoðaryfirlögregluþjónn á Egilsstöðum, sagði í kvöldfréttum Stöðvar 2 að töluverður fjöldi fólks hafi farið yfir á Seyðisfjörð í dag.

„Já það hafa mjög margir farið hér í gegn, bara núna rétt áðan þegar þau fóru björgunarsveitarfólkið, þá voru það um tvö hundruð manns sem hafa farið yfir heiðina í dag,“ segir Hjalti.

Bærinn hefur verið færður niður af neyðarstigi og á hættustig. Hjalti segir ekki liggja fyrir hvenær hægt verður að opna bæinn alveg. Hjalti segir að það þýði að enn sé yfirvofandi hætta en talið sé öruggt að hleypa inn á svæðin sem hafa verið opnuð. Enn sé þó hætta á ákveðnum svæðum en ekki á öllum stöðum.

„Það er í raun verið að vinna í stöðugu endurmati á aðstæðum. Eins og staðan er núna þá er þetta svæði sem búið er að opna talið öruggt og önnur svæði eru í frekari skoðun og endurmati.“

„Ég held að það sé ekkert hægt að lýsa því með orðum“

Fréttamenn Stöðvar 2 fengu að fara inn í bæinn í dag, þegar hann var enn mannlaus, og hittu fyrir björgunarfólk að störfum.

Mannlaus bærinn blasti við þegar ekið var niður Fjarðarheiði í morgun og aurskriðurnar sem runnið hafa niður fjöllin undanfarna daga greinilegar. Ljós loguðu í gluggum víða sem sýnir hversu hraðar hendur fólk þurfti að hafa þegar íbúum var gert að yfirgefa heimili sín fyrir tveimur sólarhringum. Björgunarfólk hvaðanæva af landinu var þá komið á svæðið til þess að undirbúa komu fólks.

„Okkar hlutverk í dag er að vera öryggisventlar fyrir þá sem eru að fara inn á svæðið vegna hættu á aurskriðum,“ segir Björk Arnardóttir, formaður Björgunarsveitar Íslands.

Varðskipið Týr kom á Seyðisfjörð og sótti þrjá sem höfðu orðið innlyksa ásamt tveimur köttum sínum eftir að skriðan féll. Skipið verður til taks eins lengi og þörf krefur.

Þá fór björgunarfólk í fyrsta sinn að skriðunni, inn fyrir hættusvæðið, til þess að koma rafmagni aftur á.

„Ég held að það sé ekkert hægt að lýsa því með orðum. Þetta er eitthvað sem maður þarf að sjá og upplifa. Þetta lítur ekkert rosalega vel út,“ segir Davíð Kristinsson varaformaður björgunarsveitarinnar Ísólfs.

Sjálfur var hann örfáum metrum frá skriðunni þegar hún féll.

„Ég sé björgunarsveitarbílinn þannig að ég stekk inn á skriðuna og næ að komast að björgunarsveitarbílnum – næ að opna hurðina á honum og ná manninum út. Við náum að synda út úr skriðunni saman,“ segir Davíð.

Eina leiðin sé áfram.

„Skriðan verður græn og við höldum áfram að dansa á Regnbogastræti,“ segir Davíð.