Útlit fyrir rauð jól víðast hvar á landinu

Lægðinni fylgja hlýindi um allt land og töluverð rigning sunnan- og vestanlands að því er segir á vef Veðurstofu Íslands.

Þá mun væntanlega hvergi falla fallegur jólasnjór á morgun og þar sem er snjór nú þegar mun hann að öllum líkindum taka eitthvað upp vegna hlýindanna.

Það verður þó misjafnt eftir landshlutum hversu mikið snjóinn tekur upp samkvæmt upplýsingum frá Veðurstofunni.

Aðfaranótt jóladags mun hins vegar kólna aftur og því er ekki útilokað að íbúar á Suður- og Vesturlandi vakni við hvíta jörð á jóladagsmorgun að því er fram kemur í hugleiðingum veðurfræðings á vef Veðurstofunnar.

Í dag, Þorláksmessu, verður annars fremur hægur vindur og víða léttskýjað á landinu en bjartviðrinu fylgir kuldi og verður frost í flestum landshlutum, sums staðar talsvert.

„Seint í kvöld er svo vaxandi sunnanátt vestanlands þegar hitaskil lægðar morgundagsins nálgast. Á morgun er útlit fyrir sunnan allhvassan eða hvassan vind, jafnvel storm norðvestantil á landinu.

Lægðinni fylgja hlýindi og rigning sunnan- og vestanlands. Aðfaranótt jóladags mun þó kólna aftur og ekki útilokað að jörð muni hvítna á Suður- og Vesturlandi,“ segir í hugleiðingum veðurfræðings.

Veðurhorfur á landinu:

Vestlæg átt, 5-10 m/s, en lengst af 8-13 suðaustantil. Bjartviðri, en stöku él með norðurströndinni. Frost 0 til 12 stig, kaldast inn til landsins norðaustanlands.

Vaxandi sunnanátt og þykknar upp í kvöld og nótt, fyrst vestanlands. Sunnan 13-18 m/s á morgun, en 18-23 víða norðvestantil. Rigning um landið sunnan- og vestanvert, annars skýjað en úrkomulítið. Hlýnandi veður, hiti 3 til 8 stig seinnipartinn.

Á fimmtudag (aðfangadagur jóla):

Sunnan 13-20 m/s og rigning, en heldur hægari og lengst af þurrt norðaustantil. Hlýnandi, hiti 1 til 7 stig síðdegis.

Á föstudag (jóladagur):

Suðvestanátt og él, allhvöss sunnan- og vestantil. Rigning í fyrstu austanlands, en léttir til þar er líður á daginn. Hiti um og undir frostmarki.

Á laugardag (annar í jólum):

Norðlæg eða breytileg átt og víða dálítil él. Frost 0 til 10 stig, kaldast inn til landsins.

Á sunnudag:

Ákveðin norðlæg átt með snjókomu eða éljum fyrir norðan og austan, en þurrt að kalla syðra. Frost 0 til 5 stig, en hiti 0 til 4 stig við suðurströndina.

Á mánudag:

Vestlæg eða breytileg átt og léttskýjað, en dálítil él austast. Frost 0 til 8 stig.