Sáttafundur Össurar og Eiðs eftir misskilning í strætó

Eiður, sem er með heilalömun (e. cerebral palsy), greindi frá því á Facebook-síðu sinni á sunnudag að hann hefði ætlað að taka strætó fyrr um kvöldið; gengið inn í vagninn, sýnt strætókort sitt og ætlað að setjast niður. Vagnstjórinn hefði þá sakað hann um að vera í annarlegu ástandi, tekið af honum strætókortið og „hent“ honum út úr vagninum.

Fjallað var um færsluna á vef DV í fyrradag. Þar sagði Guðmundur Heiðar Helgason upplýsingafulltrúi Strætó að málið virtist á misskilningi byggt. Samkvæmt frásögn vagnstjórans og myndefnis úr vagninum hefði Eiður ekki verið sakaður um að vera í annarlegu ástandi. Þá hefði kort hans verið útrunnið, komið tvo mánuði fram yfir tímann. Eiður hefði á endanum yfirgefið vagninn sjálfur.

Hörð viðbrögð eftir færslu Eiðs

Guðmundur ítrekar svo á Facebook-síðu sinni í gær að málið hafi grundvallast á misskilningi. Eiður verði reglulega fyrir miklum fordómum vegna fötlunar sinnar og sé vanur því að ókunnugt fólk haldi að hann sé ölvaður.

„Við nánari skoðun kom í ljós að málið byggðist á miklum misskilningi. Vagnstjórinn, Össur Pétur [Valdimarsson] hafði ekki sakað Eið um að vera í annarlegu ástandi. Össur stoppaði hann því að strætókortið var útrunnið. Össur gerði síðan sjálfur þau mistök að kippa veskinu hans Eiðs úr höndum hans sem varð til þess að honum þótti að sér vegið.“

Þá greinir Guðmundur frá því að færsla Eiðs hefði vakið hörð viðbrögð; bæði Össur og Eiður hefðu orðið fyrir aðkasti og einhverjir krafist brottrekstrar þess fyrrnefnda úr starfi.

„Það þarf kjark til að stíga fram og viðurkenna mistök eins og Eiður gerði. Það er erfitt að skilja hvernig er að lifa með fötlun, en ég veit að hann Eiður stefnir langt og á framtíðina fyrir sér. Við munum hittast eftir áramót og hann ætlar að skipuleggja fötlunarfræðslu með starfsfólki Strætó. Aukin fræðsla er alltaf jákvæð og vonandi verður þetta byrjunin á góðri samvinnu,“ segir Guðmundur í færslu sinni.

Með henni birtir hann mynd af Össuri og Eiði en þeir hittust yfir kaffibolla í Mjóddinni í gærkvöldi „og tóku einn hring á leið 11“. Myndina má sjá efst í fréttinni.