Lækka virði hluta­fjár síns í kísil­veri PCC

Fimm íslenskir lífeyrissjóðir og Íslandsbanki hafa lækkað virði hlutafjár síns í kísilveri PCC á Bakka við Húsavík um tvo milljarða, í einstaka tilfellum um allt að hundrað prósent.

Þetta kemur fram í Markaðnum í Fréttablaðinu í dag. Lífeyrissjóðirnir, ásamt bankanum, lögðu félaginu Bakkastakka, sem heldur utan um fjárfestingu þeirra í kísilverinu, nærri tvo og hálfan milljarð í hlutafé árið 2015. Eignarhlutur félagsins varð þannig 13,5 prósent en þýska fyrirtækið PCC SE á rest.

Í Markaðnum segir að þessar varúðarniðurfærslur lífeyrissjóðanna komi til vegna mikillar óvissu um starfsemi kísilversins.

Verksmiðjan var formlega gangsett vorið 2018 en tafir og erfiðar aðstæður á hrámörkuðum hafi einkennt starfsemina síðan.