Aðstoðarþjálfarinn tekur við af Kára

Handknattleiksdeild Fjölnis hefur gengið frá ráðningu Guðmundar Rúnars Guðmundssonar sem þjálfara meistaraflokks karla næstu tvö árin.

Guðmundur hefur undanfarin tvö ár verið aðstoðarþjálfari liðsins en hefur í mörg ár starfað hjá Fjölni sem þjálfari yngri flokka og sem styrktarþjálfari.

Kári Garðarsson hefur verið aðalþjálfari Fjölnis síðustu ár og undir hans stjórn vann liðið 1. deild í fyrra og komst þá einnig í undanúrslit bikarkeppninar. Fjölnir er hins vegar í 12. og neðsta sæti úrvalsdeildar nú þegar hlé hefur verið gert vegna kórónuveirufaraldursins, en tvær umferðir voru eftir og ljóst að Fjölnir myndi enda í fallsæti. HSÍ hefur hins vegar ekki ákveðið hvort tímabilið verði nú flautað af og hverjar afleiðingar þess yrðu.

Þetta verður frumraun Guðmundar sem aðalþjálfari í meistaraflokki. Á næstunni mun hann í samvinnu við stjórn Fjölnis fara í gegnum leikmannamál en ljóst er að liðið mun taka einhverjum breytingum fyrir næsta vetur.