Guðmundur hættur sem forstjóri Brims

Guðmundur Kristjánsson hefur ákveðið að láta af störfum sem forstjóri Brims hf. Í tilkynningu félagsins til Kauphallarinnar er hann sagður hætta vegna persónulegra ástæðna.

Þar segir jafnframt að stjórn félagsins hafi samþykkt brotthvarf Guðmundar á fundi sínum í dag. Guðmundur muni þó áfram sitja í umræddri stjórn.

Kristján Þ. Davíðsson, stjórnarformaður, hefur þar með tekið tímabundið við verkefnum og skyldum forstjóra og er honum ætlað að gera það þangað til að nýr forstjóri hefur verið ráðinn.

Útgerðarfélag Reykjavíkur, sem er stærsti eigandi Brims og í meirihlutaeigu Guðmundar, seldi í gær um 0,8 prósent hlut í Brim fyrir um 600 milljónir króna. Eftir viðskiptin fara Guðmundur og félög tengd honum með um 44 prósent eignarhlut í Brimi. 

Brim hagnaðist um 4,7 milljarða í fyrra. Samþykkt var á aðalfundi félagsins í lok mars að greiða hluthöfum um 1,9 milljarða króna í arð - sömu upphæð og árið áður. Virði hlutabréfa í Brimi hafa hækkað um næstum 9 prósent á þessu ári.