Framkvæmdastjóri Icelandic Provisions segir staðhæfingar í skyr-málinu rangar

„Á sama tíma og við hjá Icelandic Provisions og íslenskum meðstofnanda okkar MS fögnum íslenskum rótum okkar og arfleifð, þá erum við afar hreinskilin gagnvart neytendum varðandi það hvar vörur okkar eru framleiddar. 

Við tökum skýrt fram á öllum vörum okkar að við séum „framleidd með stolti í Bandaríkjunum úr innlendum og innfluttum hráefnum“ og tökum þetta skýrt fram í öllum boðskiptum. Ásakanir um að við gerum það ekki eru einfaldlega ósannar,“ er haft eftir Mark Alexander, framkvæmdastjóra Icelandic Provisions í yfirlýsingunni.

Vísir greindi frá því fyrr í dag að bandarísk lögmannsstofa hefði höfðað hópmálsókn á hendur Icelandic Provisions fyrir hönd skjólstæðinga sinna. Í stefnu málsins er fyrirtækið sakað um að villa um fyrir neytendum með því að gefa í skyn með ýmsu móti að skyr frá fyrirtækinu sé framleitt á Íslandi þegar það er í raun og veru framleitt í New York.

Það kemur hins vegar sannarlega fram á umbúðunum, eins og segir í yfirlýsingunni frá fyrirtækinu, að skyrið sé framleitt í New York.