„Þurfti nánast að slá mig utan undir í morgun“

„Stemningin er gríðarleg. Maður fer bara út í búð og þar eru allir að spyrja hvort við séum ekki allar klárar í slaginn eða eitthvað slíkt,“ segir Bryndís um stemninguna á Sauðárkróki á þessum merku tímamótum.

Fyrir þremur árum voru Bryndís og stöllur hennar að hefja leiktíð í 2. deild, þeirri þriðju efstu á Íslandi. Uppgangurinn hefur því verið hraður og í kvöld tekur Tindastóll á móti Þrótti R. í beinni útsendingu á Vísi, sjálfsagt með góðan stuðning úr Grænuklaufinni við nýlegan gervigrasvöllinn á Sauðárkróki.

„Ég þurfti nánast að slá mig utan undir þegar ég vaknaði í morgun. Draumurinn rætist í dag eftir alla þessa bið,“ segir Bryndís glöð í bragði.

„Það vill þannig til að ég var einmitt að horfa á eitthvað viðtal við mig úr sjónvarpsþætti frá árinu 2018, þegar ég vann fyrir sveitarfélagið við að sópa götur. Þá var ég eitthvað spurð út í fótboltann, og hvort við gætum eitthvað því við værum nú ekki í úrvalsdeild. Þá missti ég nú út úr mér að ég hefði svo mikla trú á mannskapnum að ég myndi ekki hætta fyrr en við kæmumst í Pepsi Max-deildina. 

Ég er nú ekki hætt og stefni ekki á það á næstunni, en nú er þetta að gerast. Í undirmeðvitundinni var alltaf stefnan að komast á þennan stað,“ segir Bryndís sem er 26 ára gömul.

Aðeins sjúkraþjálfarinn með reynslu úr efstu deild

Litlar breytingar hafa orðið á leikmannahópi Tindastóls frá því að liðið vann Lengjudeildina í fyrra, og nú reynir á hve vel leikmenn geta spjarað sig í efstu deild. Enginn þeirra hefur leikið í efstu deild með öðru liði:

„Þetta er sami kjarninn og síðustu ár, og við höfum haldið í sömu erlendu leikmennina sem er mjög sterkt fyrir okkur. Það urðu ákveðin kynslóðaskipti í „heimakjarnanum“ þegar við féllum í 2. deild og nýir árgangar komu upp, og þessi hópur hefur svo unnið sig upp saman. Sjúkraþjálfarinn okkar [Helena Magnúsdóttir, fyrrverandi leikmaður Breiðabliks] er sú eina í hópnum sem á leiki í úrvalsdeild.

Við vitum alveg að þetta er stórt stökk og allt það, en við erum tilbúnar í að láta vaða og ætlum að njóta þess,“ segir Bryndís sem líkt og liðsfélagar hennar hefur verið að selja árskort á heimaleiki Tindastóls og hlakkar til að spila fyrir framan sitt fólk gegn bestu liðum landsins:

„Ég hef fulla trú á því að það verði góð mæting í kvöld. Við þurfum fólk með okkur, við erum stemningsbær og það vita það allir.“

Lék sér í fótbolta með þjálfaranum úti á túni

Bryndís leikur nú undir stjórn Óskars Smára Haraldssonar sem tók við sem annar aðalþjálfara Tindastóls í vetur og stýrir liðinu ásamt Guðna Þór Einarssyni. Bryndís og Óskar eru einmitt systkini, frá bænum Brautarholti rétt fyrir utan Varmahlíð:

„Við spiluðum náttúrulega fótbolta saman úti á túni í sveitinni en hann hefur aldrei „þjálfað“ mig áður. Hann hefur, á jákvæðan hátt, komið með punkta fyrir mig eftir leiki sem hafa svo sem alveg nýst mér. En þetta er fyrsta reynslan af því að hann þjálfi mig og þetta hefur gengið vel hingað til,“ segir Bryndís létt.

Leikur Tindastóls og Þróttar hefst kl. 18 og er eins og fyrr segir í beinni vefútsendingu á Vísi.