Umdeild fjölmiðlasamsteypa semur við Facebook

Samningurinn felur í sér að Facebook fái að dreifa fréttum útgefandans, sem koma m.a. frá stærsta miðli Þýskalands, BILD, og einu stærri dagblaða landsins, Die Welt. Efnið mun Facebook birta undir merkjum Facebook News, sem er tilraun þeirra til stofnunar allsherjarfréttaveitu. Sú er enn ekki aðgengileg öllum Íslendingum.

Umræðan undanfarin ár hefur almennt verið á þá leið að Facebook sölsi sífellt til sín meiri völd á kostnað hefðbundinnar fjölmiðlaútgáfu en ekki er ljóst að umræddur samningur sé dæmi um slíka þróun.

Fjárhagsleg atriði samningsins eru ekki opinber en að sögn fréttaskýranda Frankfurter Allgemeine Zeitung má lesa það úr tilkynningu útgefandans að um sé að ræða nýja, trausta tekjulind fyrir fjölmiðlana.

Þannig séu blöðin farin að græða á dreifingu frétta sem voru þegar í mikilli dreifingu á samfélagsmiðlum. Það breytist ekki að öðru leyti en að nú fá menn borgað fyrir efnið.

Fréttaskýrandi FAZ telur að Axel Springer hafi gert góðan samning og jafnvel betri en hinir þýsku miðlarnir, sem flestir hafa einnig gert samning við Facebook. Töf var á samningi Springer vegna sérstöðu miðilsins, sem er risi á þýskum fjölmiðlamarkaði.

Um leið er Axel Springer Verlag harla umdeildur útgefandi meðal almennings, enda boðberi íhaldssamra gilda en um leið þekktur fyrir frjálslega meðferð á staðreyndum á miðlum BILD, sem er þó útbreiddasta dagblað Þýskalands.

Skemmst er frá því að segja að Facebook gerði svipaða samninga við ástralska fjölmiðla fyrr á þessu ári. Þar komst fjölmiðlamógúllinn Rupert Murdoch í áskrift að tekjum frá samfélagsmiðlinum en Murdoch á því sem nemur 70% af áströlskum miðlum. Hann á einnig Fox News í Bandaríkjunum.