Táningurinn vann 120 milljónir eftir hrun Thompson

Saso, sem er aðeins 19 ára gömul, og hin japanska Nasa Hataoka léku hringina fjóra á -4 höggum hvor. Því þurfti bráðabana til að skera úr um sigurvegara, og hvor þeirra fengi eina milljón Bandaríkjadala fyrir efsta sætið, eða jafnvirði 120 milljóna króna. Hataoka fékk tæplega 50 milljónum króna minna fyrir 2. sætið.

Saso tryggði sér sigurinn með þriggja metra pútti á þriðju holu bráðabanans og varð þar með annar táningurinn í sögunni til að vinna Opna bandaríska. Hin er Inbee Park sem vann mótið árið 2008.

Byrjaði skelfilega en bætti fyrir það

Hin bandaríska Lexi Thompson var í góðum málum fyrir lokadaginn en kastaði frá sér sigrinum á síðustu níu holum mótsins, þar sem hún fékk þrjá skolla og einn skramba. Hún lék síðasta hringinn því á fjórum höggum yfir pari og lauk keppni í 3. sæti, höggi á eftir Saso og Hataoka.

Saso fékk sjálf tvo skramba á fyrstu þremur holunum í gær en bjargaði sér fyrir horn og fékk til að mynda tvo fugla á síðustu þremur holunum.

„Ég var í raun svolítið niðurdregin,“ sagði Saso um byrjunina á lokahringnum. „En kylfuberinn minn ræddi við mig og sagði: „Haltu bara áfram. Það eru svo margar holur eftir.“ Það gerði ég,“ sagði Saso sem varð atvinnukylfingur í nóvember 2019.

Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum. Helgarpassa að Stöð 2 Golf má kaupa á kerfum Vodafone.