Bólu­setning á pari og engir auka­skammtar í dag

Þetta segir Ragnheiður Ósk Erlendsdóttir, framkvæmdastjóri hjá Heilsugæslu höfuðborgarsvæðisins. Þegar fréttastofa náði tali af henni voru um 400 skammtar af bóluefninu ónotaðir. Þá átti eftir að bólusetja um 200 manns inni í höllinni og enn var einhver fjöldi boðaðra í röð fyrir utan.

„Við erum hætt að hleypa inn og það verða engir aukaskammtar,“ segir Ragnheiður en undanfarið hefur stundum verið hægt að fara í bólusetningu seinnipart dags án þess að vera með boðun, þegar mæting hefur verið dræm. Þannig var það til að mynda í gær, þegar bólusett var með bóluefni Janssen, sem gekk þó allt út á endanum.

Ragnheiður segir að bólusetning hafi um það bil verið á pari, það er að segja að sá fjöldi sem búist var við hafi mætt, þó einhverjir sem fengu boðun í dag kunni að sitja eftir með sárt ennið og enga bólusetningu í dag. Réttur þeirra til bólusetningar fellur þó ekki niður, heldur helst hann áfram og viðkomandi geta framvísað strikamerki sínu næst þegar bólusett er með bóluefni Pfizer.

Á morgun verður bólusett með bóluefni Moderna á höfuðborgarsvæðinu, og er um seinni bólusetningu að ræða auk bólusetningar hópa sem dregnir voru af handahóf. Á morgun er röðin komin að körlum fæddum 1982.