Varasamir vindstrengir á Vesturlandi

Spáð er suðvestan 5-10 metrum á sekúndu á vestanverðu landinu og dálítilli vætu framan af í dag. Í öðrum landshlutum er gert ráð fyrir hægum vindi og þurru.

Fyrir hádegi gengur í sunnan 10-15 m/s með rigningu en hvassara í vindstrengjum á Vesturlandi. Á norðanverðu Snæfellsnesi er varað við snörpum vindstrengjum og meðalvind á bilinu 15-23 m/s.

Norðaustan- og austanlands verður hægari vindur og þurrt fram á kvöld. Hiti verður á bilinu átta til sextán stig, hlýjast á Austurlandi.

Á morgun spáir Veðurstofan vestan og síðan norðvestan 5-13 m/s. Víða verður dálítil rigning eða súld en stytta á pp að mestu á sunnanverðu landinu síðdegis. Hitinn verður á bilinu sex til tólf stig en allt að fimmtán stig á Suðausturlandi.