Nóg hafi verið að þiggja afmælisboð Björgólfs til að komast á svartan lista

Halldór, fyrrverandi framkvæmdastjóri hjá Alvogen og Alvotech, hefur skilað af sér greinargerð fyrir Héraðsdómi Reykjavíkur. Þar er til meðferðar dómsmál Alvogen gegn Halldóri sem er sakaður um trúnaðarbrot í starfi. Halldór tekur til varna og segir Alvogen og Alvotech hafa lekið nafni hans og heilsufarsupplýsingum til fjölmiðla. Eftir að hann steig fram sem uppljóstrari hafi honum verið sagt upp störfum.

Lýsir „skæruliðahernaði“ Róberts

Halldór hefur sent frá sér yfirlýsingu til fjölmiðla í tilefni dómsmálsins og vísar til greinargerðarinnar. Um er að ræða nýjasta útspilið í deilum vinanna fyrrverandi en Halldór var um árabil aðstoðarmaður Róberts. 

Halldór segir Róbert, forstjóra og stjórnarformann Alvogen, hafa nýtt lykilstjórnendur lyfjafyrirtækjanna og beitt undirmenn sína þrýstingi frá árinu 2010 til að koma höggi á ýmsa í viðskiptalífinu. Róbert hafi meðal annars lekið trúnaðarupplýsingum er varða bankaleynd.

Halldór segir „skæruliðahernað“ Róberts gegn á þriðja tug óvildarmanna hafa staðið yfir í ellefu ár, sem hafi gengið út á að klekkja á þekktum athafnamönnum í íslensku viðskiptalífi, opinberum embættismönnum og blaðamönnum. Vaxandi ágreiningur hafi myndast milli hans og Róberts vegna þessa.

Halldór segist í yfirlýsingunni hafa greint stjórnum Alvogen og Alvotech frá því hvernig Róbert hafi nýtt stjórnendur fyrirtækjanna með þessum hætti, en „slökkviliðið“ hafi verið of upptekið af „hvítþvotti“ forstjórans og hafi ekki sýnt þessu nokkurn áhuga.

Fjöldi meintra óvildarmanna

Halldór nefnir ýmsa meinta óvildarmenn Róberts til sögunnar, þá Andra Sveinsson, Birgi Bieltvedt, Birgi Má Ragnarsson, Björgólf Thor Björgólfsson, Björgólf Guðmundsson, Claudio Albrecht fyrrv. forstjóra Actavis, Ernu Kristjánsdóttur og syni hennar Ólaf og Kristján Guðmundssyni, Frank Pitt, Guðmund Kristjánsson, Gunnar Fjalar Helgason, Heiðar Guðjónsson, Magnús Þorsteinsson, Matthías Johannessen, Peter Prock fyrrv. aðstoðarforstjóra Actavis, Ragnar Þórison og Tómas Áka Gestson,“ segir í yfirlýsingu Halldórs.

Auk þess megi nefna meinta erlenda óvildarmenn Róberts sem höfðu þegið boð í afmælisveislu Björgólfs Thors.

„Þá Ari Salmivuori fyrrum hluthafa í Landsbankanum og Georg Tsvetanski kaupsýslumann. Vel á annað hundrað greinar birtust í fjölmiðlum er sköpuðu neikvæða umræðu um fjármál, bankaviðskipti og önnur trúnaðarmál, sem tengdust ofangreindum aðilum.“

Gagnaleki og hópmálsókn

Halldór segir að gögnum innan úr bankastjórnum Landsbanka Íslands og Straumi banka hafi markvisst verið lekið og megi þar meðal annars nefna samskipti bankaráðs við Fjármálaeftirlitið, upplýsingar um lánafyrirgreiðslur meintra óvildarmanna og ýmis önnur samskipti og gögn sem bundin séu bankaleynd og hafi átt sér stað fyrir fjármálahrunið.

Halldór segist meðal annars hafa lagt fram gögn sem sýna hvernig Róbert hafi falið Árna Harðarsyni, aðstoðarforstjóra Alvogen, að leka trúnaðarupplýsingum innan úr Landsbanka og Straumi til fjölmiðils, sem hann hafi fjármagnað og síðar eignast. Róbert var um tíma eigandi Vefpressunnar sem rak DV.

Halldór segir að stór hluti samskiptanna hafi átt sér stað í gegnum tölvupósta fyrirtækisins, en einnig í gegnum netföng með dulnöfnum. Í greinargerð Halldórs kemur einnig fram að Róbert hafi falið lykilstjórnendum fyrirtækjanna, þar á meðal Árna Harðarsyni aðstoðarforstjóra, Þór Kristjánssyni framkvæmdastjóra og fyrrum bankaráðsmanni hjá Landsbankanum og Straumi, ásamt Halldóri að undirbúa og leiða hópmálsókn gegn Björgólfi Thor Björgólfssyni.

Sinnti verkefnum af fúsum og frjálsum vilja

Málsóknin var gerð í nafni fyrrum hluthafa Landsbankans þrátt fyrir að Alvogen, Alvotech eða Róbert sjálfur hafi aldrei verið hluthafar í bankanum.

„Þá var Þór Kristjánsson ráðinn til Alvogen á árinu 2010 gagngert til að afhenda upplýsingar sem nýst gætu í fyrirhugaðri málsókn Róberts. Lögmannsstofan Landslög tók við umræddum gögnum frá duldum netföngum Þórs og hefur leitt málið síðastliðin 11 ár fyrir hönd Róberts. Halldór hefur afhent tugi tölvupósta og annarra dómsskjala með greinargerð sinni sem staðfesta ofangreinda málavexti og sýna hvernig Róbert og lykilstjórnendur Alvogen og Alvotech höfðu fulla stjórn á umræddri hópmálsókn með Landslögum, og dreifðu trúnaðarupplýsingum til fjölmiðla í störfum sínum fyrir fyrirtækin.“

Halldór segist hafa sinnt þessum verkefnum af fúsum og frjálsum vilja, líkt og aðrir lykilstjórnendur fyrirtækjanna og muni ekki firra sig ábyrgð í þeim efnum.

Jafnvel dýrkeypt að þiggja afmælisboð

„Ég benti „slökkviliðinu“ á það hvernig Róbert nýtti undirmenn sína og fjármuni fyrirtækjanna óspart í þeim tilgangi að koma höggi á meinta óvildarmenn. Á löngum köflum gafst lítill tími til að sinna mikilvægum málefnum innan fyrirtækjanna vegna verkefna sem höfðu ekkert með rekstur þeirra að gera. Að lokum var svo komið að ég sem stjórnandi og hluthafi gat ekki horft lengur upp á þráhyggju og hatur Róberts gagnvart þessum aðilum og hvernig fyrirtækjunum var beitt í þeim efnum,“ segir Halldór.

„Ég gerði alvarlegar athugasemdir við Róbert sumarið 2018 og aftur á átakafundi þann 1. september 2020 vegna þessara mála, en þá voru málefni meintra óvildarmanna orðin einstaklega persónuleg og meiðandi. Í framhaldinu átti ég ekki annan kost en að stíga fram sem uppljóstrari og greina stjórnum fyrirtækjanna frá málavöxtum.“

Oft hafi verið nóg að vera faðir meints óvildarmanns eða jafnvel að starfa með föður hans til að fá á baukinn.

„Í ákveðnum tilvikum reyndist það meira að segja dýrkeypt að hafa þegið boð í afmæli. Skæruhernaður Róberts í gegnum Alvogen og Alvotech, ásamt umtalsverðum fjárfestingum í fjölmiðlum á undanförnum árum, sýna hversu miklu var tjaldað til þegar klekkja átti á meintum óvildarmönnum.“