Leik­menn kvenna­liðs Man United hafa fengið nóg og leita til leik­manna­sam­takanna

Samkvæmt heimildum íþróttamiðilsins The Athletic eru leikmenn Man United pirraðir á því hversu illa það hefur gengið að finna arftaka Casey Stoney sem sagði starfi sínu lausu í maí eftir þrjú ár frá félaginu. Leikmenn Man Utd vilja ræða við leikmannasamtökin þar sem þeim finnst nálgun félagsins á kvennalið þess hafa farið versnandi undanfarna mánuði.

Leikmenn telja að félagið sé almennt metnaðarlaust þegar kemur að kvennaliðinu og vilja fá að vita hver stefna liðsins fyrir komandi tímabil er. Liðið sótti sterka leikmenn fyrir síðasta tímabil í þeirri von um að blanda sér í toppbaráttuna. 

Í stað þess að byggja ofan á gott tímabil í fyrra virðist sem metnaðurinn sé nær enginn og lýsir það sér eflaust best í því að ekki er enn búið að ráða þjálfara.

Samkvæmt heimildum Athletic eru leikmenn búnir að missa trú á Steve Deaville, fjármálastjóra sem hefur verið hálfgerður framkvæmdastjóri kvennaliðsins og John Murtough sem er yfirmaður knattspyrnumála hjá Manchester United.

Martin Ho, aðstoðarþjálfari liðsins á síðustu leiktíð, hefur stýrt liðinu í upphafi undirbúningstímabilsins. Leikmannahópur liðsins er einkar þunnskipaður þar sem flest stærstu nöfn liðsins eru hofin á braut. 

Bandaríska tvíeykið Christen Press og Tobin Heath framlengdu ekki samninga sína, Amy Turner samdi við Gunnhildi Yrsu Jónsdóttur og stöllur í Orlando Pride. Framherjarnir Jess Sigsworth og Jane Ross hafa leitað á ný mið og þá er nær örugggt að Lauren James, ein efnilegasta knattspyrnukona Englands, muni semja við Englandsmeistara Chelsea. 

Lauren hefur ágætis tengingu við Chelsea en hún er uppalin í Lundúnum og bróðir hennar - landsliðsbakvörðurinn Reece James - leikur með karlaliði félagsins.

„Félagið hefur ráðið nýjan liðslækni, sjúkraþjálfara og íþróttafræðinga fyrir kvennaliðið ásamt því að leit að aðalþjálfara heldur áfram. Félagið vill taka sér tíma svo besti einstaklingurinn verði örugglega ráðinn,“ segir í yfirlýsingu frá Manchester United.

Þrjú ár eru síðan Manchester United setti kvennalið á laggirnar og hefur gengi þeirra síðan þá verið frábært. Liðið var ekki langt frá því að ógna stórliðum Chelsea, Manchester City og Arsenal á síðustu leiktíð en betur má ef duga skal.

Eins og staðan er í dag virðist sem Man Utd gæti farið sömu leið og Liverpool sem féll úr deildinni á þar síðustu leiktíð og var aldrei nálægt því að komast upp í ár.