Vand­ræði Man Utd meiri en við fyrstu sýn: Leik­menn í­huguðu að fara í verk­fall

Vísir greindi frá því nýverið að mikill glundroði ríki hjá félaginu. Leikmenn eru pirraðir hversu lengi það tekur að finna arftaka Casey Stoney ásamt því að þeir eru ósáttir með metnaðarleysi á leikmannamarkaðnum sem og með æfingaaðstöðu liðsins.

Nýjustu upplýsingar The Athletic staðfesta að pirringurinn hefur verið að gerjast í dágóða stund. Stoney íhugaði að segja starfi sínu lausu rúmum tveimur mánuðum áður en hún lét verða af því í mars á þessu ári. Ræddi hún meðal annars við Ed Woodward um málið en hann sagði starfi sínu lausu skömmu síðar eftir afhroðið sem Ofurdeild Evrópu var.

Leikmenn íhuguðu að fara í verkfall til að vekja stjórnarmeðlimi félagsins af værum blundi. Þær telja aðstöðu sína á Carrington, æfingasvæði félagsins, ekki boðlega þar sem þær geta ekki skipt um föt né farið í sturtu á svæðinu. 

Einnig er völlurinn sem liðið æfir á ekki í sama gæðaflokki og aðrir vellir á svæðinu. Hann er illa drenaðru sem þýðir að hann verður þungur og erfitt er að æfa þar þegar hin víðsfræga Manchester-rigning lætur sjá sig.

Þó forráðamenn kvennaliðsins segja þjálfaraleit vera í fullum gangi og að leikmenn verði sóttir í kjölfarið þá hefur Glazer fjölskyldan, eigendur Manchester United, aldrei haft mikinn áhuga á kvennaliði félagsins. Var kvennaliðið til að mynda lagt niður er fjölskyldan keypti Man Utd árið 2005.

„Það var aldrei í áætlunum okkar að taka þátt í kvennaknattspyrnu á hæsta stigi,“ sagði í yfirlýsingu fjölskyldunnar á sínum tíma. 

Árið 2018 sá hún að sér og setti lið á laggirnar. Casey Stone var ráðin sem þjálfari og virðist sem hæfileikar hennar innan vallar sem utan hafi verið aðalástæða þess að liðið flaug upp í úrvalsdeildina og endaði svo í 4. sæti á eftir stórliðum Chelsea, Manchester City og Arsenal.

Stoney gafst þó upp á að reyna búa til kjúklingasalat úr kjúklingaskít og sagði upp. Nú er ljóst að hver sem tekur við mun eiga í stökustu vandræðum að ógna toppliðum deildarinnar nema mikið breytist. 

Félagið hefur misst sína sterkustu leikmenn og nýr þjálfari þarf að byrja á því að sannfæra Lauren James – eina efnilegustu knattspyrnukonu Englands – að vera áfram í herbúðum liðsins en hún er orðuð við Chelsea annan hvern dag. Þá þarf að styrkja leikmannahópinn til muna en kvennalið Manchester United hefur ekki fjárfest í leikmanni í aðallið sitt síðan félagið samdi við Maríu Þórisdóttur þann 22. janúar síðastliðinn.

Úrvalsdeild kvenna á Englandi skrifaði nýverið undir stærsta samning í sögu deildarinnar. Umfjöllun mun aukast til muna og áhorf ætti að aukast sömuleiðis á næstu leiktíð. Það virðist þó sem Man United ætli sér að berjast á botni deildarinnar frekar en toppi.