Fékk ofsa­kvíða­kast á fimm stjörnu hóteli og á­kvað að breyta til

Eva er lög­fræðingur að mennt og jóga­kennari. Hún hefur lengi verið virk í Sam­fylkingunni en pólitíkin á ekki hug hennar eins og er.

Hún sinnir enn verk­efnum sem lög­fræðingur en and­leg mál­efni og ekki síst list­ræn eiga nú einnig hug hennar.

Eva Lúna ræddi þessa breytingu á sér í Harma­gedd­on síðasta föstu­dag.

Gat ekki farið út af hótelherberginu

Spurð hvort það hafi verið ein­hver einn at­burður sem leiddi til þess að hún fór að leita meira inn á við segir hún þá hafa verið marga. Einn standi þó upp úr:

„Ég man alveg eftir því, ég var á ein­hverju fimm stjörnu hóteli í Amsterdam og var að fara að vinna á vinnu­ráð­stefnu. Og ég var bara í ein­hverju svona ofsa­kvíða­kasti. Gat ekki farið út og eitt­hvað svona sem ég hef aldrei lent í áður,“ segir Eva. „Það er bara eitt­hvað sem gerist þá, þá um­turnast ég.“

Hún hafi átt að halda stóra kynningu á sér­fræðinga­ráð­stefnunni og að lokum komist í gegn um það með herkjum.

Eftir þetta hafi hún rambað á bók um and­leg mál­efni sem hafi verið vakning fyrir hana.

„Þetta and­lega ferða­lag sem við erum að tala um… Maður er oft bara hvar er ég stödd og hvað er ég að gera? En þetta snýst um að tengjast inn á við,“ segir hún. „Fara þangað og treysta því alveg óháð því hvort sam­fé­lagið sé að gera kröfu um að þú sért í ein­hverjum kassa. Þessi kassi er enginn sann­leikur.“

Hefur prófað sveppi og aya­huas­ca

Spurð hvort hún hafi prófað of­skynjunar­lyf eins og margir gera á sinni and­legu veg­ferð segist hún hafa gert það.

„Ég hef tekið aya­huas­ca og ég hef farið í svona sveppa­ferða­lag.“

Breytti það við­horfi þínu til lífsins?

„Ekki mikið. Ég var náttúru­lega búin að vera á Ind­landi með ein­hverjum gúrúum og upp­lifað ein­hverja svona reynslu í gegn um hug­leiðslu. Þannig að fyrir mér var þetta ekkert svona extra,“ segir hún.

Eva tekur þó fram að slík of­skynjunar­lyf geti hjálpað fólki að sjá eitt­hvað í sinni sjálfs­skoðun ef það notar þau rétt og fer inn í þá reynslu með á­setning um það.

Hefur logið og haldið framhjá

At­riði sem skipta meira máli fyrir hana nú en áður eru til dæmis að elta hjartað og vera góð manneskja.

„Það skiptir bara rosa­lega miklu máli. Þá líður þér betur. Ég hef alveg prófað hitt,“ segir Eva.

„Að vera með allt í smá ó­reiðu hér og þar. Bara já hér er ég að setja smá hvítar lygar, hér eru bara hreinar lygar, hér var ég ein­hvern tíma að halda fram hjá. Bara allt þetta.“

Hún hefur nú gefið út sitt fyrsta lag og segir von á plötu í ná­kominni fram­tíð.