Slysið haft mikil áhrif á feril Sölva: „Bíllinn flaug 40 metra“

Slysið átti sér stað á föstudeginum 13. september 2002 þegar Sölvi Geir var aðeins 18 ára gamall. Hann og félagi hans sem var við stýrið höfðu þá verið í kappakstri við annan bíl, en misstu stjórn á bílnum með þeim afleiðingum að bíllinn flaug 40 metra áður en hann lenti á hvolfi þannig að þakið kramdist.

„Við vorum að keyra dálítið hratt, hraðar en má, og félagi minn missir stjórn á bílnum og við förum út af á miklum hraða og fljúgum þarna einhverja 40 metra í lausu lofti niður brekku. Þetta var bara mjög slæmt bílslys þar sem ég fæ þakið ofan á hausinn á mér og kremst allur þarna í bílnum,“ segir Sölvi í viðtali við Guðjón Guðmundsson.

Misst af 40 til 50 prósent leikja

Allir í bílnum steinrotuðust og Sölvi Geir meiddist illa á baki við slysið. Bakmeiðslin hafa dregið dilk á eftir í gegnum allan hans feril. Sölvi hefur misst af fjölda leikja hvar sem hann hefur verið sökum þrálátra bakmeiðsla.

„Þetta hefur bara haft áhrif á bakið mitt í gegnum minn feril. Ég er sennilega búinn að missa af 40 til 50 prósent af leikjum sem ég hefði annars spilað í gegnum ferilinn út af bakmeiðslum. Þannig að þetta hefur haft gríðarleg áhrif á ferilinn allavega.“ segir Sölvi Geir.

Sölvi lék með Víkingi fram til ársins 2004 þegar hann fór til Djurgården í Svíþjóð ásamt Kára Árnasyni, en þeir leika saman í vörn Víkinga í dag. Hann spilaði aðeins 35 leiki á fimm árum í Svíþjóð áður en hann átti góð fimm ár með SönderjyskE og FC Kaupmannahöfn í Danmörku.

Hann lék svo í Rússlandi, Kína og Taílandi árin 2013 til 2017 áður en hann sneri heim í Víkina.

„Einhver sem var að vaka yfir mér“

Enn í dag þakkar Sölvi þó fyrir að ekki fór verr, enda komust allir lífs af frá slysinu þrátt fyrir alvarleika þess. Aðspurður um hvort þetta sitji enn fast í minninu segir hann:

„Þetta gerir það. Þegar þú ert á svona miklum hraða í lausu lofti, þú gleymir ekki þannig augnabliki.“

„Það var einhver sem var að vaka yfir mér á þessu augnabliki, það er nokkuð ljóst.“ segir Sölvi Geir.

Hættir í haust

Sölvi Geir sagði í viðtali sem Vísir birti í gær að þetta tímabil yrði hans síðasta. Hann kom til félagsins fyrir sumarið 2018 og vann bikartitil árið 2019. Hann segist vera orðinn langþreyttur á baráttunni við eigin líkama og því fari skórnir upp í hillu í haust.

„Þetta er búið að vera bras. Það er búið að vera bras að halda sér heilum í gegnum þetta tímabil. Þetta er síðasta tímabilið sem ég spila, hnéð er orðið handónýtt og bakið er mjög laskað sem er búið að vera það allan ferilinn þannig að þetta er búið að vera mjög krefjandi að halda sér heilum í gegnum þetta tímabil. Þetta er búið að taka á.“ sagði Sölvi við Stöð 2.

Hann vonast eftir að ljúka ferlinum á titli með Víkingi en liðið er aðeins fyrir neðan topplið Vals á markatölu eftir sigurinn á þeim í fyrradag. Breiðablik er stigi á eftir liðunum tveimur og á leik inni. Gríðarjöfn toppbarátta er því fram undan í Pepsi Max-deild karla.

Víkingar - Fullkominn endir er heimildaþáttaröð í fjórum hlutum um Íslands- og bikarmeistara Víkings. Áskrift að Stöð 2 Sport kostar frá kr. 3.990 og má kaupa áskrift á stod2.is.