Þeir sem þurfi á gjör­gæslu ýmist óbólu­settir eða bólu­settir með undir­liggjandi sjúk­dóma

Sjúklingur á sextugsaldri lést á Landspítala í gær vegna Covid-19. Þetta er annað andlátið vegna sjúkdómsins í vikunni en sjúklingur á sjötugsaldri lést á gjörgæsludeild spítalans á miðvikudag. Runólfur Pálsson, yfirmaður Covid-göngudeildarinnar hefur ekki upplýsingar um það hvort hinir látnu voru bólusettir eða ekki.

„Þeir sem hafa komið inn á spítalann og veikst mjög alvarlega og endað inni á gjörgæsludeild hafa ýmist verið óbólusettir eða með undirliggjandi sjúkdóma. Þannig að við höfum ekki verið með einstaklinga hérna sem hafa verið áður hraustir, bólusettir sem hafa veikst svona alvarlega.“

66 greindust smitaðir af kórónuveirunni innanlands í gær og voru 48 þeirra utan sóttkvíar við greiningu eða 72,2 prósent. Fjórtán liggja á spítala með sjúkdóminn.