Í kjölfar Covid: Snúa vörn í sókn með enn meiri íslenska hönnun

„Við ákváðum að snúa vörn í sókn með því að opna fleiri verslanir þegar faraldurinn var í rénun,“ segir Bjarney Harðardóttir eigandi Rammagerðarinnar. „Neytendur um allan heim eru orðnir meðvitaðri um áhrif framleiðslu vara og flutnings þeirra á umhverfið. Vörur sem eru hannaðar og framleiddar í nærsamfélaginu hafa því aukið samkeppnisforskot.“ 

Að snúa vörn í sókn

Rammagerðin er ein elsta gjafavöruverslun landsins en hún hefur selt íslenska hönnun frá stofnun eða í rúm 80 ár. 

Síðustu árin hafa erlendir ferðamenn staðið á bak við stærsta hluta teknanna sem árin fyrir Covid jukust í takt við fjölgun ferðamanna.

„Kórónuveirufaraldurinn kom þungt niður á rekstri félagsins í fyrra sem skilaði sér í 80% samdrætti á tekjum á milli ára,“ segir Bjarney og bætir við: „Við vorum að gera upp rekstrarárið í fyrra og með því að ráðast í neyðaraðgerðir þá tókst okkur að lækka rekstrarkostnaðinn um 62% á milli ára en þrátt fyrir það þá hljóðaði tapið upp á 88 milljónir króna og eiginfjárhlutfall félagsins í árslok var 69%.“

Að sögn Bjarneyjar nýtti félagið sér viðspyrnustyrki stjórnvalda til að takast á við tekjutapið.

„Og með aukinni sölu á heimamarkaði og fjölgun ferðamanna hafa tekjur aukist jafnt og þétt á árinu.“

Til að átta sig betur á því hversu þung áhrif heimsfaraldursins voru, má nefna að öllum verslunum Rammagerðarinnar var lokað um tíma nema einni.

Þá voru starfsmenn Rammagerðarinnar aðeins tveir í upphafi þessa árs.

Í ágúst síðastliðnum voru starfsmenn orðnir 35 talsins.

Bjarney segir að þegar verslanirnar voru lokaðar, var reynt að nýta tímann í að undirbúa hvernig viðspyrnan gæti farið fram.

„Við notuðum tímann og hittum tugi hönnuða og ræddum með hvaða hætti við gætum náð enn betur til íslenskra viðskiptavina,“ segir Bjarney.

Niðurstaðan af þeirri vinnu var að vera með breiðara úrval en áður af íslenskri hönnun en eins að fara í samstarf við hönnuði.

Samstarf sem þetta, prófaði Rammagerðin einmitt í miðri Covid-bylgju.

„Við fórum í markaðs- og hönnunarsamstarf við unga hönnuði fyrir jólin 2020 sem fékk mjög jákvæð viðbrögð hjá Íslendingum og má nefna því til staðfestingar að salan á Þorláksmessu var hærri en árið á undan í verslun okkar á Skólavörðustíg 12 sem var eina verslunin sem við lokuðum ekki í Covid,“ segir Bjarney.

Verslanirnar senn sex talsins

Verslanir Rammagerðarinnar verða senn sex talsins því nýverið opnaði Rammagerðin verslun í Kringlunni og fljótlega er stefnt á opnun í Hörpu. Aðrar verslanir eru á Skólavörðustíg 7, Skólavörðustíg 12, í Perlunni, í Flugstöð Leifs Eiríkssonar og í Lava Center á Hvolsvelli.

Hver verslun byggir á sínu eigin þema.

Sem dæmi má nefna, er versluninni í Kringlunni fyrst og fremst ætlað að höfða til Íslendinga. Sú verslun er sú fyrsta sem býður einvörðungu upp á íslenska vöru og vörumerki en að sögn Bjarneyjar á Hönnunarmars mikinn þátt í því að áhugi Íslendinga á íslenskri hönnun hefur aukist.

„Við ætlum að auka samstarfið við hönnuði og grasrótina ásamt því að selja áfram klassíska og þekkta hönnun og handverk,“ segir Bjarney og bendir á að góð hönnun eykur verðmætasköpun og líftíma vara.

Þá segir Bjarney síðustu árin hafa einkennst af uppgangi í hönnun og því sé hönnun og listir vaxandi stoð í íslensku samfélagi. Þá sé íslensk hönnun vel samkeppnishæf við hönnunarvörur annarra þjóða.

Það eru mikil tækifæri fyrir íslenskt atvinnulíf að setja sér stefnu í þessum málum og styðja markvisst við íslenska hönnun. 

Það fæli í sér mikla verðmætasköpun fyrir íslenskt efnahagslíf ef íslenskt atvinnulíf myndi nýta betur innlenda hönnuði í framleiðslu og uppbyggingu í sinni starfsemi. Hönnun skiptir sköpum í upplifun og þjónustu í öllum atvinnugeirum.“