Ráku Koeman í flugvélinni

Barcelona tapaði 1-0 fyrir Rayo Vallecano í gær. Það var kornið sem fyllti mælinn hjá forráðamönnum Barcelona sem ákváðu að segja Koeman upp störfum. Tíðindin komu eflaust fáum á óvart enda sat Hollendingurinn í afar heitu sæti eftir slaka byrjun Börsunga á tímabilinu. Barcelona er í 9. sæti spænsku úrvalsdeildarinnar og hefur ekki byrjað tímabil jafn illa í 34 ár.

Samkvæmt fréttum spænskra fjölmiðla var Joan Laporta, forseti Barcelona, mjög reiður eftir tapið í gær. Eftir að hafa ráðfært sig við aðra stjórnarmenn og meðlimi í starfsliði Barcelona ákvað hann að taka í gikkinn og reka Koeman. Hann fékk tíðindin meðan flugvél Börsunga var í loftinu á leið heim frá Madríd.

Seint í gærkvöldi sendi Barcelona svo frá sér tilkynningu að Koeman hefði verið leystur frá störfum hjá félaginu. Hann stýrði Barcelona aðeins í fjórtán mánuði. 

Brokkreksturinn var ekki ódýr fyrir Barcelona en talið er að Koeman fái tíu milljónir punda frá félaginu vegna starfslokanna. Börsungar eiga í miklum fjárhagskröggum og munar um hverja krónu.

Xavi er talinn líklegastur til að taka við Barcelona. Hann er goðsögn hjá félaginu og var um tíma fyrirliði Barcelona.