Barna­her­bergi tekin í gegn í Foss­vogi: „Þetta er æði“

Soffía Dögg Garðarsdóttir kíkti því í heimsókn á systkinin Matthew Davíð og Freyju Dís í nýjasta þættinum af Skreytum hús. Helga Dís segir að Matthew Davíð sé ekki ungbarn lengur og því sé kominn tími á að breyta herberginu. 

„Núna þarf hann að fá svona stóra stráks herbergi og ég kann bara ekki að gera svoleiðis þannig að ég er að stóla á að Soffía hjálpi mér með það.“

Herbergi Freyju Dísar var notað sem geymsla þegar Soffía Dögg byrjaði á verkefninu svo það var alveg óskrifað blað. 

„Það eina sem Freyja á hér inni er í þessum kassa,“ sagði Helga Dís og benti á pappakassa á gólfinu.

Soffía Dögg var hrifin af því að herbergin væru eins að stærð og ákvað að spegla þau svolítið til að tengja þau saman. Hún tók svo ákvörðun um að gera flottan skrautlistavegg í strákaherberginu og útkoman var virkilega vel heppnuð.

Þáttinn má sjá í heild sinni í spilaranum hér fyrir neðan og við mælum með því að þú horfir á þáttinn áður en þú lest áfram, þar sem lokaútkomuna má finna neðar í greininni. Nýr þáttur af Skreytum hús birtist svo hér á Vísi og á Stöð 2+ efnisveitunni alla miðvikudaga næstu vikur.

„Barnaherbergi þurfa auðvitað að vera ævintýraleg og skemmtileg en jafnframt líka þá vil ég ná ákveðinni ró í rýmið,“ sagði Soffía Dögg áður en hún fór af stað í breytingarnar. 

Í strákaherberginu setti Soffía Dögg upp grindur á veggina fyrir bækur. Matthew Davíð er tvítyngdur og því hafði hún eina grind með bókum á íslensku og aðra fyrir bækur á ensku. 

„Ég er eiginlega orðin töluvert meira en pínulítið stressuð núna,“ viðurkenndi Soffía Dögg á lokametrunum í breytingunum. En allt hófst þó að lokum og erfiðisvinnan var svo sannarlega þess virði að mati Soffíu Daggar.  

Skrautlistaveggurinn var málaður blár og setti sterkan svip á herbergið. 

„Ég ráðlegg ykkur að ef þið ætlið að gera panel-vegg, að gefa ykkur meira en fjóra tíma. Þetta er vel gerlegt, en þetta tekur tíma,“ ráðleggur Soffía Dögg áhorfendum.

Viðbrögð Matthews Davíðs leyndu sér ekki, hann var hoppandi kátur með lokaútkomuna á herberginu og stökk í fangið á Soffíu Dögg. 

„Þetta er æði,“ sagði Helga Dís þegar hún skoðaði herbergið hans. 

Stelpuherbergið var bleikt og fengu ljósir og bleikir tónar að njóta sín. Falleg blóm og hangandi órói ásamt litlum hillum settu fallegan svip á herbergið. 

Gólfmotta og léttar og ljósar gardínur gerðu herbergið enn hlýlegra. 

„Ég er ótrúlega ánægð með allt sem er búið að gera,“ sagði Helga Dís eftir að hún hafði skoðað stelpuherbergið.

Í ítarlegri bloggfærslu á síðunni Skreytum hús er hægt að finna frekari upplýsingar um breytingarnar og þær vörur sem Soffía Dögg notaði til þess að breyta rýminu. Einnig nákvæmar leiðbeiningar um það hvernig skrautlistaveggurinn var gerður. 

Soffía Dögg gerði tvö „moodboard“ fyrir breytingarnar til þess að sjá betur fyrir sér lokaútkomuna.

Hægt er að sjá breytinguna og horfa á þáttinn í heild sinni í spilaranum hér ofar í fréttinni. Þættirnir eru sýndir á miðvikudögum hér á Vísi og fara samhliða því inn á Stöð 2+.