Allir tónleikar Jóla­vina Emm­sjé Gauta með óbreyttu sniði og jólunum bjargað

Gauti tilkynnti síðar í dag að tekist hafi tryggja að tónleikarnir fari sömuleiðis fram í óbreyttri mynd þann 23. desember. Í Facebook-færslu sem birtist klukkan 17:17 segir hann að þar með hafi jólunum verið bjargað.

Fréttastofa ræddi við Gauta fyrr í dag en á tímabili ríkti miskilningur um það hvenær ný reglugerð um sóttvarnatakmarkanir myndi taka gildi. Willum Þór Þórsson heilbrigðisráðherra sagði að loknum ríkisstjórnarfundi að nýjar reglur tækju gildi á miðnætti en síðar kom í ljós að þær taka gildi á miðnætti annað kvöld. 

„Það sem við héldum í upphafi var að við værum að missa út 22. desember en staðan er bara sú að sýningarnar 22. halda sig allar inni hjá okkur,“ segir Gauti en þrjár sýningar eru á dagskrá hjá honum í Háskólabíói á morgun, klukkan 17, klukkan 20 og klukkan 23. 

„Þetta er búinn að vera ágætis rússíbani í dag, upp og niður. Við héldum fyrst að við værum búin að missa allar sýningarnar, allt væri komið niður í 200 á miðnætti í kvöld en við erum bara að halda plani. Æfingarplanið færist um klukkutíma en sýningarnar eru á sínum stað á morgun,“ segir hann. 

Verið er að selja miða á tónleika, sem verða 23. desember, og verða í streymi. Því ættu allir að geta notið ljúfra tóna Jólavina Gauta heima í stofu, sama hvernig fer. Aron Can, Salka Sól, Steindi JR, Selma Björns, Herra Hnetusmjör og fleiri verða á tónleikunum með Gauta.

Gauti hvetur alla sem eru á leið á sýninguna á morgun að virða sóttvarnareglur og taka þurfi stöðunni alvarlega. 

„Við þurfum að vera í þessu saman og næst verður þetta vonandi yfirstaðið og við verið öll á háhest.“

Búið sé að setja upp sviðið, bandið sé að æfa og margra mánaða undirbúningur nú í húfi. 

„Miðað við hvernig fréttirnar voru í morgun, maður þurfti aðeins að þurrka augun með tissjúi í morgun, en þetta er aðeins bjartar,“ segir Gauti. 

Mikill fjöldi fólks á bak við hverja sýningu

Sama hvað sé þetta mikill skellur. 

„Sama hvernig á þetta er litið, og ef ég tek mig út fyrir sviga, er þetta svakalega mikill skellur fyrir skemmtanabransann í heild sinni. Þetta hefur auðvitað þau áhrif að það er tekjutap í allar áttir og fullt af fólki sem er að missa út vinnu,“ segir Gauti. 

„Það sem fólk áttar sig ekki á er að það sér bara frontmennina. En til dæmis bara á bak við mína sýningu eru hátt í sextíu manns sem eru að starfa og auðvitað kemur fólk mismikið að sýningunni en þetta er svaka tap fyrir svaka stóran hóp af fólki. Það sem er erfitt við þetta er að ef þetta væri bara afmælisveisla sem maður planaði fyrir tveimur dögum væri þetta ekkert mál en þetta er margra mánaða vinna að setja upp svona sýningu. En þetta fer bara einhvern vegin, við tökum bara æðruleysið á þetta núna.“

Horfir bjartsýnn fram á veginn

Síðustu tvö árin hafi verið mikil rússíbanareið.

„Þetta er bara búið að vera þannig að alltaf þegar maður nálgast markið þá dettur maður. En eins og ég segi er auðvitað nauðsynlegt að við séum öll í þessu saman og þess vegna vil ég biðja okkar gesti að fara extra varlega. Og maður skilur af hverju er verið að grípa til aðgerða en maður spyr sig með fyrirvarann sem maður fær, það er það sem er þunginn í þessu öllu saman. En veiran er lúmsk og kemur með engum fyrirvara en maður verður að vera bjartsýnn og horfa jákvætt á þetta.“

Fréttin hefur verið uppfærð klukkan 17:40 með nýjum upplýsingum um fyrirkomulag þorláksmessutónleikanna.