Hörður Ingi til Sogndal

Hörður Ingi, sem er 23 ára, lék 21 af 22 leikjum FH í Pepsi Max-deildinni á síðasta tímabili. Hann er uppalinn hjá FH og gekk aftur til liðs við Fimleikafélagið 2020 eftir dvöl hjá Víkingi Ó., HK og ÍA.

Hörður Ingi lék sinn fyrsta A-landsleik gegn Mexíkó í fyrra. Hann lék átján leiki með U-21 árs landsliðinu, þar á meðal alla þrjá leiki þess á EM í fyrra.

Sogndal endaði í 6. sæti norsku B-deildarinnar á síðasta tímabili. Þjálfari liðsins er Tore André Flo, fyrrverandi leikmaður Chelsea og norska landsliðsins.