Mokveiði loðnuskipa og Börkur landaði stærsta farmi sögunnar

Í fréttum Stöðvar 2 voru sýndar myndir Ómars Bogasonar á Seyðisfirði frá komu skipsins til hafnar í hádeginu á föstudag. Það þykir til marks um burðargetu þessa nýjasta skips Síldarvinnslunnar hvað Börkur var lítið siginn þegar hann kom inn með farminn, sem reyndist vera 3.409 tonn. Þetta er ekki aðeins stærsti loðnufarmur Íslandssögunnar heldur mesti fiskafli sem vitað er um úr einni veiðiferð af Íslandsmiðum.

Mikill fjöldi norskra loðnuskipa hefur sett svip sinn á austfirskar hafnir undanfarna daga. Samkvæmt upplýsingum frá Landhelgisgæslunni voru 34 erlend fiskiskip að loðnuveiðum í lögsögu Íslands í dag; 28 norsk, fjögur grænlensk og tvö færeysk. Þannig eru þau erlendu mun fleiri en íslensku loðnuskipin, sem eru 22 talsins, en erlendu skipin eiga rétt á um þrjátíu prósentum af um 900 þúsund tonna loðnukvóta.

Á skipastaðsetningarsíðunni Marine Traffic sást í dag að íslensku, færeysku og grænlensku skipin voru flest á Vopnafjarðargrunni norðaustanlands meðan þau norsku voru undan sunnanverðum Austfjörðum.

Þá hafa hafrannsóknaskipin Árni Friðriksson og Bjarni Sæmundsson skannað miðin undanfarnar tvær vikur og voru í dag að ljúka loðnuleiðangrinum undan Suðausturlandi. Bíða menn spenntir eftir niðurstöðum og nýrri ráðgjöf um kvóta, sem von er á fyrir helgi.

Samkvæmt upplýsingum Guðmundar Óskarssonar, sviðsstjóra hjá Hafrannsóknastofnun, hefur loðna sést mjög víða en hún er þó enn dreifð og lítið farin að þjappa sér saman í stórar torfur. Þá virðist enn langt í hrygningu.

Loðnuskipstjórar og ráðamenn útgerðanna kvarta þó ekki, segja mikinn kraft kominn í veiðarnar og Gunnþór Ingvason hjá Síldarvinnslunni lýsir veiðinni síðustu fjóra daga sem mokveiði. Skip hafi verið að fá allt að tvö þúsund tonn á sólarhring.

Samkvæmt upplýsingum Fiskistofu var samanlagður afli íslensku skipanna í dag kominn í 244 þúsund tonn, sem er um 37 prósent af ríflega 660 þúsund tonna kvóta Íslendinga. Svo mikill er aflinn að vinnslustöðvarnar hafa vart undan og eru dæmi um að íslensk skip hafi landað bæði í Noregi og Færeyjum.

Loðnan hefur á vertíðinni til þessa að mestu farið í fiskimjölsvinnslu en núna er byrjað að frysta hana til manneldis. Má búast við því að verðmæti hennar aukist á næstu vikum eftir því sem nær dregur hrygningu.

Hér má sjá frétt Stöðvar 2:

Í þættinum Um land allt í fyrra var fjallað um loðnuveiðar. Hér má sjá níu mínútna kafla úr þættinum: